پاريجدە اشىلعان اباي ءمۇسىنى ەل تاۋەلسىزدىگىنىڭ 30 جىلدىعىنا ارنالدى
نۇر-سۇلتان قالاسىنىڭ اكىمى التاي كولگىنوۆ Instagram پاراقشاسىندا پاريجدە قازاقتىڭ باس اقىنى اباي قۇنانباي ۇلىنىڭ ءبيۋستى اشىلعانىن ءمالىم ەتتى، دەپ حابارلايدى Almaty-akshamy.kz.
«پاريج قالاسىندا قازاقتىڭ باس اقىنى، اعارتۋشى، ويشىل اباي قۇنانباي ۇلىنىڭ ءبيۋستى اشىلدى. بيۋست ءپاريجدىڭ ورتالىعىندا اقىندار الاڭىندا ورناتىلدى، وندا فرانسۋز جازۋشىسى ۆيكتور گيۋگو، ورىس اقىنى، پروزا جازۋشىسى الەكساندر پۋشكين جانە ت.ب. ەسكەرتكىشتەرى بار.
اباي قۇنانباي ۇلىنىڭ ءمۇسىنى تاۋەلسىزدىگىمىزدىڭ 30 جىلدىعى قارساڭىندا اشىلدى. ۇيىمداستىرۋشىسى – ق ر فرانسياداعى ەلشىلىگى، بيۋست دەمەۋشىلىك قاراجات ەسەبىنەن اشىلدى.
مەملەكەت باسشىسىنىڭ تاپسىرماسى بويىنشا قالامىزدىڭ ەكونوميكاسىنا جەكە ينۆەستيسيالار تارتۋ بويىنشا جۇمىس جۇرگىزىپ جاتىرمىز. پاريج قالاسىنىڭ مەرى انن يدالگومەن دوستىق پەن ىنتىماقتاستىق تۋرالى پاكتىگە قول قويىپ، بىرلەسكەن جوبالاردى جۇزەگە اسىرۋدى تالقىلادىق. ماسەلەن، نۇر-سۇلتاندا 30-دان استام فرانسۋز كومپانياسى جۇمىس ىستەيدى. بۇل بىرلەسكەن ماڭىزدى جوبالاردى اشۋ جانە جەكە ينۆەستيسيالاردى تارتۋ عانا ەمەس، سول سياقتى قوسىمشا جۇمىس ورىندارىن قۇرۋ بولىپ سانالادى.
بىرلەسكەن جوبالار سانىن كەڭەيتەتىن بولامىز. سونىمەن بىرگە ەلوردامىزدا فرانسيانىڭ جەكە ينۆەستيسيالارى ەسەبىنەن جەكە مەكتەپ سالۋ تۋرالى كەلىسىمگە كەلدىك. سونداي-اق، مۋزەيلەر ۇجىمىن كەلەسى جىلى كورمەلەرىمەن شاقىردىق، ولار ەلوردامىزدىڭ مادەني سالاسىن دامىتۋعا ءوز ۇلەسىن قوساتىنى ءسوزسىز»، - دەپ جازدى ەلوردا اكىمى.