فرانسيا استاناسى پاريج قالاسىندا ءوتىپ جاتقان وليمپيادا ويىندارىنىڭ سالتاناتتى جابىلۋ راسىمىندە قازاقستان تۋىن كىمدەر الىپ شىعاتىنى بەلگىلى بولدى.
ناقتىراق ايتساق، ويىنداردىڭ جابىلۋ شاراسىندا ەل تۋىن ەرلەردەن تاەكۆوندوشى باتىرحان تولەۋعالي مەن ايەلدەر اراسىندا كوركەم گيمناستيكادان ەل نامىسىن قورعاعان ەلجانا تانييەۆا الىپ شىعادى، دەپ حابارلايدى aqshamnews.kz
ايتا كەتسەك، باتىرحان تولەۋعالي پاريجدە 80 كەلىگە دەيىنگى سالماقتا سىنعا ءتۇستى. ول 1/8 اينالىمدا ەكى دۇركىن الەم چەمپيونى، يتاليالىق سيمونە الەسسيومەن كەزدەسكەن بولاتىن. تارتىستى جەكپە-جەكتە تاجىريبەلى يتاليالىق سپورتشى 2:0 ەسەبىمەن جەڭىسكە جەتتى. باتىرحان تولەۋعالي قازاقستان ساپىنان وليمپياداعا قاتىسىپ جاتقان ەڭ جاس اتلەت. 18 جاستاعى سپورتشىنىڭ بۇل تۇڭعىش وليمپياداسى.
ال ەلجانا تانييەۆا پاريج وليمپياداسىندا ءتورت جاتتىعۋدىڭ قورىتىندىسى بويىنشا فينالعا وتە الماعان ەدى. ول ءتورت جاتتىعۋدىڭ ناتيجەسى بويىنشا 126.600 ۇپاي جينادى.
ەستەرىڭىزگە سالا كەتسەك، فرانسيا استاناسى پاريج قالاسىندا وتكەن ءحححىىى جازعى وليمپيادا ويىندارىنىڭ سالتاناتتى اشىلۋ راسىمىندە ەلىمىزدىڭ كوك تۋىن بوكستان قازاقستان ۇلتتىق قۇراماسىنىڭ كاپيتانى اسلانبەك شىمبەرگەنوۆ پەن جەڭىل اتلەت ولگا سافرونوۆا ۇستاپ شىققان بولاتىن.