پاريج وليمپياداسىنىڭ باستالۋىنا 50 كۇن قالدى. ال ۇلتتىق قۇراما قورجىنىنداعى جولدامالاردىڭ جالپى سانى 56 بولدى، دەپ حابارلايدى almaty-akshamy.kz.
ارينە، بۇل – سالىستىرمالى تۇردە تومەن كورسەتكىش. سوڭعى ليسەنزيالاردى بوكسشىلارىمىز جەڭىپ الدى. ولار تايلاندتا وتكەن الەمدىك الامانعا قاتىسقان بولاتىن جانە كەشە اقتىق كەزدەسۋلەر ءوتتى. بارلىق سالماقتا جولداما الدىق بوكسشىلار بارلىق سالماقتا جولداما الدى. بىرەر ساعات بۇرىن تايلاند استاناسى بانگكوك قالاسىندا ليسەنزيالىق تۋرنير مارەسىنە جەتتى. ايتا كەتۋ كەرەك، بۇل – پاريج وليمپياداسى الدىنداعى سوڭعى ىرىكتەۋ جارىسى. قازاقستاننىڭ ەرلەر قۇراماسىنا ءبىر جولداما جەتىسپەي تۇر ەدى. ونى ورتا سالماقتاعى مۇحاممەدسابىر بازارباي ۇلى جەڭىپ الدى. جەرلەسىمىز اقتىق سىندا مولدوۆا وكىلى الەكساندر پاراسكيۆتەن باسىم ءتۇستى. قورىتىندى ەسەپ: 5:0. جالپى مۇحاممەد وسى باسەكە بارىسىندا وتە اۋىر جولمەن ءجۇرىپ ءوتتى. دەسە دە سوڭىنا دەيىن تاباندىلىق تانىتىپ، نەگىزگى ماقساتىنا قول جەتكىزدى. وسىلاي قازاقستاندىق جىگىتتەر پاريج وليمپياداسىنا 7 سالماقتا قاتىسادى. ياعني، باس باپكەر مىرزاعالي ايتجانوۆ ليسەنزياعا قاتىستى جوسپاردى تولىق ورىندادى. ەندى ءدال وسىلاي مەدالعا قاتىستى جوسپاردى دا جۇزەگە اسىرادى دەپ ۇمىتتەنەمىز. بوكسشىلار جازعى ويىداردان كەمى 1 التىن يەمدەنەمىز دەگەن مىندەتتەمە الىپ وتىر. ايەلدەر بوكسىنداعى تاريحي جەتىستىك ال ايەلدەر بوكسىندا تاريحي ناتيجە تىركەلدى. قازاقستان العاش رەت وليمپيادا ويىندارىنا 3 بىردەي قىزىن قاتىستىرادى. بۇل جونىندە تايلاندتاعى ليسەنزيالىق تۋرنيردەن كەيىن بەلگىلى بولدى. ايتا كەتەيىك، بۇرىمدى بوكسشىلارىمىز اراسىنان العاشقى جولدامانى بىلتىر ازيا ويىندارىندا كارينا يبراگيموۆا جەڭىپ العان بولاتىن. ال بانگكوكتاعى الەمدىك الاماندا ۆالەنتينا حالزوۆا مەن نازىم قىزايباي ليسەنزياعا قول سوزدى. 75 كەلىدە ونەر كورسەتەتىن ۆالەنتينا اقتىق سىندا كولۋمبيا سپورتشىسىن ۇتسا، نازىم سولتۇستىك كورەيا وكىلىنەن باسىم ءتۇستى. قوس كەزدەسۋ دە 5:0 ەسەبمەن اياقتالدى. ايتا كەتەيىك، قازاقستان قۇراماسى ايەلدەر بوكسى بويىنشا وليمپيادا ويىندارىنا بۇعان دەيىن 3 مارتە قاتىستى. ءبىراق جولداما العان سپورتشىلارىمىزدىڭ سانى ەكەۋدەن اسپايتىن. پاريج-2024: ەل نامىسىن كىم قورعايدى؟ سمەتوۆ، سەرىكبايەۆ نەمەسە شامشادين. دزيۋدودان پاريج وليمپياداسىنا كىمنىڭ قاتىساتىنى ءالى كۇنگە دەيىن بەلگىسىز. ەرلەر اراسىنداعى ەڭ جەڭىل سالماقتا 3 بىردەي ۇمىتكەرىمىز بار. ولار: ەلدوس سمەتوۆ، نۇرقانات سەرىكبايەۆ جانە ماعجان شامشادين. ۇشەۋى دە مەدالعا قول سوزا الاتىن نەگىزگى سپورتشىلارىمىز سانالادى. ال وليمپياداعا ءار ەلدەن ءار سالماقتا ءبىر عانا سپورتشى قاتىسا الادى. سوندىقتان وتاندىق باپكەرلەر ناقتى كىمدى جىبەرەرىن بىلمەي، باس قاتىرىپ جاتىر. وسى تۇرعىدا بۇرىنعى مەملەكەتتىك جاتتىقتىرۋشى ءارى سپورت فۋنكسيونەرى جاندوس قونىسبايەۆ جىگىتتەر اراسىندا ءوزارا سپاررينگ وتكىزىپ، ناعىز مىقتىنى انىقتاۋدى ۇسىندى.
«بۇل جەردە دزيۋدوعا جاۋاپتى فەدەراسيا مەن سپورتقا جاۋاپتى كوميتەت دۇرىس شەشىم قابىلداۋى قاجەت. سەبەبى بەلگىسىز سەبەپتەرمەن نە جەكە ادامداردىڭ ويلارىمەن ءبىر سپورتشىنى تاڭداپ جىبەرەتىن بولساق، قالعان ەكەۋىنە وبال بولادى»، – دەدى ول.
ايتا كەتەيىك، جۋىردا عانا جاڭارتىلعان وليمپيادالىق رەيتينگ بويىنشا نۇرقانات سەپرىكبايەۆ 15ء-شى، ەلدوس سمەتوۆ 22ء-شى، ال ماعجان شامشادين 24ء-شى ورىندا تۇر. ۇلتتىق قۇرامانى كىم جاتتىقتىرادى؟ ستانيسلاۆ چەرچەسوۆ ۇلتتىق قۇراماعا كەلە مە؟ ءقازىر فۋتبول جانكۇيەرلەرى وسى سۇراققا جاۋاپ تاپپاي الەك. ويتكەنى قازاقستان كومانداسىنىڭ باس باپكەرى رەسەيلىك ماگومەد ادييەۆ بىرەر كۇن بۇرىن قىزمەتىنەن كەتتى. ەندى ونىڭ ورنىنا تاعى ءبىر رەسەيلىك ستانيسلاۆ چەرچەسوۆ كەلەدى دەگەن اقپارات شىعىپ جاتىر. ءتىپتى قازاقستان فۋتبول فەدەراسياسىنىڭ پرەزيدەنتى ادىلەت بارمەنقۇلوۆ ستانيسلاۆ چەرچەسوۆتى نەگىزگى ۇمىتكەر دەپ مالىمدەدى.
«ءقازىر ءبىز 5 بىردەي ماماندى قاراستىرىپ جاتىرمىز. ونىڭ ىشىندە ءنومىرى ءبىرىنشىسى – ستانيسلاۆ چەرچەسوۆ. ءبىز ونىمەن سويلەستىك جانە ناقتى شەشىمدى دۇيسەنبى كۇنى جاريالايمىز»، – دەدى بارمەنقۇلوۆ كورشى ەلدىڭ ريا نوۆوستي پورتالىنا بەرگەن سۇحباتىندا.
ال چەرچەسوۆ بولسا كۇنى كەشە ەشكىممەن سويلەسپەگەنىن جانە ەشتەڭە بىلمەيتىنىن جەتكىزدى. ايتا كەتەيىك، ۇلتتىق كوماندامىز وسى ايدا 2 جولداستىق كەزدەسۋ وتكىزۋى كەرەك. ياعني، 7 ماۋسىمدا ارمەنيامەن، 11 ماۋسىمدا ازىربايجانمەن جولىعادى.