پاريج وليمپياداسىنا سپورتشىلاردىڭ دايىندىعى قاي دەڭگەيدە؟

ق ر سپورت كوميتەتى ءمالىم ەتكەندەي، XXXIII جازعى وليمپيا ويىندارى 26 شىلدە مەن 11 تامىز ارالىعىندا وتەدى. ءتورتجىلدىقتىڭ باستى دوداسىنا الەمنىڭ 205 ەلىنەن 10 مىڭنان استام سپورتشى قاتىسادى دەپ جوسپارلانعان. پاريجدەگى دودادا 32 سپورت تۇرىنەن 329 مەدال جيىنتىعى ساراپقا سالىنادى.

قازىرگى تاڭدا قازاقستان ۇلتتىق قۇراماسىنىڭ قورجىنىندا پاريج وليمپياداسىنىڭ 19 ليسەنزياسى (سپورتتىڭ 8 تۇرىنەن) بار (ساداق اتۋ – 4، ۆەلوشوسسە – 3، نىسانا كوزدەۋ – 5، قازىرگى بەسسايىس – 2، بوكس – 2، گرەك-ريم كۇرەسى – 1، ەركىن كۇرەس – 1، سپورتتىق گيمناستيكا – 1). وليمپيا ويىندارىنا دەيىن 69 ليسەنزيالىق جارىس قالدى. ونىڭ ىشىندە 5 الەم چەمپيوناتى، 7 ازيا چەمپيوناتى جانە 57 رەيتينگتىك تۋرنير بار.

«بيىلعى جىلدىڭ باستى سپورتتىق وقيعاسى – پاريجدەگى جازعى وليمپيا ويىندارى بولماق. شتابتىڭ الداعى ماقساتى – حالىقارالىق تۋرنيرلەردە سپورتشىلاردىڭ ءساتتى ونەر كورسەتۋىنە جاعداي جاساۋ جانە مۇمكىندىگىنشە كوپ ليسەنزيا ولجالاۋ. قۇراما كوشباسشىلارى ءار سپورت ءتۇرىنىڭ ەرەكشەلىگى، سپورتشىنىڭ قاجەتتىلىگى، مەديسينالىق-بيولوگيالىق تۇرعىدا قامتاماسىز ەتىلگەنى، ونىڭ ىشىندە فيزيوتەراپيا، وڭالتۋ مەن جاراقاتتاردىڭ الدىن الۋ، پسيحولوگيالىق قولداۋ جانە جارىسقا دايىندىق كەزىندە كۇيزەلىستى جەڭۋ سياقتى جاعدايلار ەسكەرىلگەن جەكە جوسپار بويىنشا دايىندالادى. سونىمەن قاتار شتاب سپورتشىلار مەن دەلەگاسيا مۇشەلەرىن كەرەك-جاراقپەن قامتاماسىز ەتۋ ماسەلەسىن قاراستىرىپ جاتىر»، - دەدى وليمپياداعا دايىندىق جونىندەگى شتاب باسشىسى ەلسيار قاناعاتوۆ.

شتاب – مەملەكەت باسشىسىنىڭ تۋريزم جانە سپورت مينيسترلىگى، ۇلتتىق وليمپيادا كوميتەتى جانە سپورت فەدەراسيالارى بىرلەسە جۇمىس ىستەۋ كەرەك دەگەن تاپسىرماسىن ورىنداۋ ماقساتىندا قۇرىلعان ۋاكىلەتتى ورگان. شتابتىڭ نەگىزگى جۇمىسى – سپورتشىلاردىڭ الداعى جارىستارعا ساپالى دايىندىعىن قامتاماسىز ەتۋ. شتاب بارلىق كەشەندى جارىستار اياقتالعانعا دەيىن تۇراقتى نەگىزدە جۇمىس ىستەيتىن بولادى.