2024 جىلى پاريجدە وتەتىن وليمپيادا ويىندارىنىڭ ۇيىمداستىرۋ كوميتەتى سپورتتىق ءىس-شارالارعا بيلەتتەردىڭ جاپپاي ساتىلىمى باستالعانىن جاريالادى.
اكسيا كەشە، 17 ساۋىردە باستالدى، دەپ حابارلايدى Almaty-akshamy.kz ۇلتتىق وليمپيادا كوميتەتىنە سىلتەمە جاساپ.
ۇيىمداستىرۋشىلار بيلەت ساتىپ الىپ ۇلگەرمەگەن جانكۇيەرلەرگە سىيلىق جاساپ، وليمپيادانىڭ باستالۋىنا 100 كۇن قالۋىن اتاپ ءوتۋدى ءجون كورگەن.
ءبىرقاتار سپورت تۇرلەرىندە بيلەت ساتىلىمى توقتاتىلعان ەدى. اكسيا ارقىلى تۋريستەر مەن جانكۇيەرلەرگە وليمپيادالىق جارىستاردى كورۋگە سوڭعى مۇمكىندىك بەرىلىپ وتىر. ول ءۇشىن بارلىق سپورت تۇرلەرىنە، سونىڭ ىشىندە ورىندار تولىق ساتىلىپ كەتكەن جارىستارعا 250 مىڭ بيلەت ساتىلىمعا شىعارىلدى.
بيلەتتەردىڭ ەڭ تومەنگى باعاسى – 24 ەۋرو. ۇيىمداستىرۋشىلار مۇنداي بيلەتتەردىڭ 20 مىڭ داناسىن ۇسىنىپ وتىر. قالعاندارىنىڭ قۇنى سپورت تۇرىنە بايلانىستى بولادى جانە شامامەن 1000 ەۋروعا دەيىن بارادى.
ولاردى ءالى دە ينتەرنەت ارقىلى تەك رەسمي بيلەت پلاتفورماسىنان ساتىپ الۋعا بولادى. قوناقجايلىق پاكەتتەرى دە بار، وندا بيلەتتەرمەن بىرگە تۇرعىن ءۇي ۇسىنىلادى. جانكۇيەرلەر دەڭگەيىنە بايلانىستى كەز-كەلگەن ورنالاساتىن جەردى تاڭداي الادى، ءارتۇرلى ەكسكۋرسيالار مەن ينتەراكتيۆتەرگە جازىلۋ مۇمكىندىگى دە بار.
مۇنداي پاكەتتەردى ساتىپ العاندار ءۇشىن Clubhouse24 قولجەتىمدى بولادى. بۇل – وليمپيادا وتەتىن ورىننىڭ ءارتۇرلى بولىگىندە ورنالاسقان 200 ارنايى الاڭ. جانكۇيەرلەرگە فرانسيا تاعامدارىمەن تانىسۋ، سپورتشىلاردىڭ مەن ارتىستەردىڭ ونەرىن تاماشالاۋ، جارىستاردى كورۋ جانە ت.ب. ۇسىنىلادى.
تۋريستەر پاريج تىنىسىمەن تانىسۋى ءۇشىن ءۇشىن ساناتتار بويىنشا ارنايى پاكەتتەر جيناعى دايىندالعان: تاريح جانە مادەنيەت، تاماق پەن شاراپ، ءسان جانە ستيل، زاماناۋي پاريج، وتباسىلىق، بەلسەندى جانە ساۋىقتىرۋ دەمالىسى.
قوناقجايلىق پاكەتتەرىن On Location پلاتفورماسى ارقىلى ساتىپ الۋعا بولادى، ول ۇش-بەس جۇلدىزدى رەيتينگى بار ءبىرقاتار قوناقۇيلەرمەن جانە توپتارمەن جۇمىس ىستەيدى، ونىڭ ىشىندە ويىنداردى ۇيىمداستىرۋ كوميتەتىنىڭ سەرىكتەسى Accor دا بار. ايتا كەتەرلىگى، جيىنتىققا اۋە بيلەتتەرىنىڭ قۇنى كىرمەيدى.
وليمپيادا جانە پاراليمپيادا ويىندارىنا بيلەتتەردىڭ جالپى سانى 13 ميلليوننان اسادى.
ايتا كەتەرلىگى، بيلەتتەر پلاتفورماعا جۇگىنۋ كەزەگى بويىنشا ساتىلادى. سوندىقتان ۇلگەرگىڭىز كەلسە، اسىققان ءجون. بۇل ورىندار تۇگەل ساتىلىپ كەتكەن سپورت تۇرلەرىندە بيلەتكە قول جەتكىزۋدىڭ سوڭعى مۇمكىندىگى.
2024 جىلعى وليمپيادا ويىندارى پاريجدە 26 شىلدە مەن 11 تامىز ارالىعىندا وتەدى.