Pantone ينستيتۋتى 2026 جىلدىڭ باستى ءتۇسىن جاريالادى. ول - Cloud Dancer (11-4201)، ياعني بەيتاراپ اق رەڭك. ينستيتۋت وكىلدەرىنىڭ ايتۋىنشا، "Cloud Dancer ءبىزدى ادەتتەن تىس ويلاۋعا، جاڭا مۇمكىندىكتەرگە اشىق بولۋعا ۇندەيدى". ال بۇل تاڭداۋ راسىمەن ومىرىمىزگە اسەر ەتە مە؟ مۇنىڭ ءمانىن Aqshamnews.kz ءتىلشىسى انىقتاپ كوردى.
Pantone دەگەن نە؟
Pantone - اقش-تا قۇرىلعان، تۇستەر جۇيەسىن ازىرلەۋمەن جانە ستاندارتتاۋمەن اينالىساتىن ءىرى كومپانيا. ول ديزاينەرلەرگە، باسپا ءىسى مەن برەندتەرگە ارنالعان تۇستەر پاليتراسىن جاساپ، نارىقتاعى ترەندتەردى تالدايدى جانە بولجايدى.
كومپانيا 1950-جىلدارى نيۋ-يوركتە قۇرىلعان. ال 1960-جىلدارى Pantone الەمدەگى بارلىق تۇستەردى بىرىزدەندىرگەن Pantone Matching System (PMS) جۇيەسىن ويلاپ تاپتى. بۇل جۇيەدە ءار تۇسكە اتاۋ مەن ءنومىر بەرىلگەن. سونىڭ ارقاسىندا ديزاينەر مەن تاپسىرىس بەرۋشى ءبىر-بىرىن ءدال تۇسىنە الادى.
بۇگىندە Pantone جۇيەسى ينتەرەر ديزاينىندا، ءسان يندۋسترياسىندا، پوليگرافيادا كەڭىنەن قولدانىلادى. ءتىپتى كانادا مەن وڭتۇستىك كورەيا سەكىلدى ەلدەر مەملەكەتتىك رامىزدەردىڭ تۇستەرىن تاڭداۋدا Pantone كەستەسىنە سۇيەنەدى.
"جىل ءتۇسى" دەگەن نە؟
Pantone قۇرامىنداعى Pantone Color Institute - ءتۇستىڭ ادام ەموسياسىنا، قوعامعا جانە تۇتىنۋشىلىق سۇرانىسقا اسەرىن زەرتتەيتىن ينستيتۋت. 2000 جىلدان بەرى ينستيتۋت جىل سايىن بەلگىلى ءبىر ءتۇستى "جىلدىڭ باستى ءتۇسى" دەپ جاريالاپ كەلەدى.
بۇل - ويدان شىعارىلعان جاڭا ءتۇس ەمەس، Pantone كاتالوگىندا بۇرىننان بار رەڭك. ينستيتۋت ساراپشىلارىنىڭ پىكىرىنشە، بۇل ءتۇس كينو، ءسان، ديزاين، تەحنولوگيا سەكىلدى سالالاردا الداعى جىلى ەرەكشە سۇرانىسقا يە بولادى.
2026 جىلدىڭ باستى ءتۇسى - Cloud Dancer 11-4201، بەيتاراپ اق رەڭك.
Pantone ينستيتۋتىنىڭ سيپاتتاماسىنا سايكەس، بۇل ءتۇس:
- تىنىشتىق پەن ايقىندىقتى بىلدىرەدى؛
- ۆيزۋالدى تازالىق پەن كەڭىستىك سەزىمىن تۋدىرادى؛
- فۋنكسيونالدىلىق پەن ەموسيانى ۇيلەستىرەدى؛
- بولاشاققا اشىقتىقتى، جاڭا باستامانى سيپاتتايدى.
ينستيتۋت وكىلدەرى Cloud Dancerء-دى "تازا پاراقپەن" سالىستىرادى: بولاشاق ءار ادامعا تيەسىلى ەكەنىن ەسكە سالاتىن ءتۇس.
جىل ءتۇسىن قالاي تاڭدايدى؟
Pantone-دا بۇل ءۇشىن ناقتى فورمۋلا جوق. ينستيتۋت ديرەكتورى لەاتريس ايزماننىڭ ايتۋىنشا، ءبارى - تالداۋ مەن باقىلاۋعا نەگىزدەلگەن.
ساراپشىلار:
- ءسان اپتالىقتارىن (اسىرەسە ميلان، پاريج، لوندون)؛
- كورمەلەر مەن ارت-جوبالاردى؛
- كينوفيلمدەردەگى ۆيزۋالدى پاليترانى؛
- اۆتوكولىك يندۋسترياسىنداعى تۇستەردى؛
- مەگاپوليس تۇرعىندارىنىڭ كيىم تاڭداۋىن باقىلايدى.
ايزماننىڭ سوزىنشە، اۆتوكولىك وندىرۋشىلەر تۇستەر ترەندىندە بارىنەن الدا: "جاڭا كولىكتىڭ ءتۇسىن كورگەن ادام ءدال سونداي رەڭكتەگى اياقكيىم، ەرىن دالابى نەمەسە ينتەرەر بوياۋىن قالايدى".
جىلىنا ەكى رەت Pantone ينستيتۋتىنىڭ وكىلدەرى قۇپيا جەردە جينالىپ، تالداۋ جۇرگىزەدى. ال جەلتوقسان ايىندا كەلەسى جىلدىڭ باستى ءتۇسى رەسمي تۇردە جاريالانادى.
بۇل شىنىمەن اسەر ەتە مە؟
ماڭىزدىسى - Pantone ترەندتى ويلاپ تاپپايدى، تەك بار تەندەنسيانى بەكىتەدى. ياعني ءتۇس Pantone ارقاسىندا ەمەس، ءوزى تانىمال بولعانى ءۇشىن "جىل ءتۇسى" اتانادى.
دەگەنمەن رەسمي مارتەبە العان سوڭ، بۇل ءتۇس ودان ءارى كەڭ تارالادى. Pantone جىل سايىن «جىل تۇسىندەگى» سۋۆەنيرلەر مەن گادجەتتەر شىعارادى. سونىمەن قاتار كوسمەتيكا جانە ءسان برەندتەرىمەن بىرلەسكەن كوللەكسيالار ۇسىنادى.
مىسالى:
Sephora بىرنەشە جىل قاتارىنان Pantone-پەن كوللابوراسيا جاساعان؛
2018 جىلعى Ultra Violet تۇسىنە Butter London ارنايى لاك پەن تەني شىعارعان؛
Loewe، JCPenney، Room Copenhagen ۇيگە ارنالعان بۇيىمدار ۇسىنعان.
ال ءىرى ءسان ۇيلەرى كوبىنە كەرىسىنشە Pantone-عا اسەر ەتەدى.
Pantone نۇسقاسى بويىنشا جىل تۇستەرى (2000–2026)
2026 - Cloud Dancer، 2025 - Mocha Mousse، 2024 - Peach Fuzz، 2023 - Viva Magenta، 2022 - Very Peri، 2021 - Ultimate Grey & Illuminating، 2020 - Classic Blue، 2019 - Living Coral، 2018 - Ultra Violet، 2017 - Greenery، 2016 - Rose Quartz & Serenity، 2015 - Marsala، 2014 - Radiant Orchid، 2013 - Emeral، 2012 - Tangerine Tango، 2011 - Honeysuckle، 2010 - Turquoise، 2009 - Mimosa، 2008 -Blue Iris، 2007 - Chili Pepper، 2006 - Sand Dollar، 2005 - Blue Turquoise، 2004 - Tigerlily، 2003 - Aqua Sky، 2002 - True Red، 2001 - Fuchsia Rose، 2000 - Cerulean
Pantone "جىلدىڭ ءتۇسىن" كەزدەيسوق تاڭدامايدى. بۇل - قوعامدا، مادەنيەتتە جانە نارىقتا پىسىپ-جەتىلگەن ترەند. ال Pantone ونى رەسمي تۇردە بەكىتىپ، اسەرىن كۇشەيتەدى. ناتيجەسىندە ءتۇس ترەندكە اينالىپ، ءومىرىمىزدىڭ ءار سالاسىنا ەنىپ كەتەدى.