رەسپۋبليكا بويىنشا تىركەلگەن جۇمىسسىزدىق دەڭگەيى 2،4%-عا تەڭ.
قازاقستاندا جۇمىسپەن قامتۋدىڭ يكەمدى تۇرلەرى قارقىن الۋدا، ازاماتتار ءوز بيزنەستەرىن بەلسەندى دامىتىپ جاتىر، دەپ حابارلايدى Almaty-akshamy.kz.
مامانداردىڭ ايتۋىنشا، 2020 جىلدىڭ ۇقساس كەزەڭىمەن سالىستىرعاندا، ءوزىن-وزى جۇمىسپەن قامتىعانداردىڭ سانى 2،9%-عا وسكەن، ال جالدامالى قىزمەتكەرلەر سانى 0،6%-عا ۇلعايعان.
«وسىنداي جاعدايدى جۇمىسپەن قامتىلعان حالىقتىڭ سەرپىنىنەن دە بايقاۋعا بولادى، ولاردىڭ سانى ءبىر جىلدا 101،3 مىڭ ادامعا (+1،2%) 8 805 مىڭ ادامعا دەيىن ءوستى. سونىمەن قاتار، جۇمىسپەن قامتىلعانداردىڭ قۇرىلىمىندا جالدامالى ەڭبەككە قاراعاندا ءوزىن-وزى جۇمىسپەن قامتۋدىڭ ايتارلىقتاي ءوسۋى بايقالادى. اعىمداعى جىلدىڭ 2-توقسانىندا ءوزىن-وزى جۇمىسپەن قامتىعانداردىڭ سانى 2020 جىلدىڭ ۇقساس كەزەڭىمەن سالىستىرعاندا 2،9%-عا نەمەسە 60،2 مىڭ ادامعا ارتتى، ال جالدامالى جۇمىسكەرلەردىڭ سانى 0،6%-عا نەمەسە 41،1 مىڭ ادامعا ۇلعايدى»، – دەلىنگەن ەڭبەك جانە حالىقتى الەۋمەتتىك قورعاۋ مينيسترلىگىنىڭ حابارلاماسىندا.
بۇل رەتتە ءوزىن-وزى جۇمىسپەن قامتۋ قۇرىلىمىن تالداۋ اعىمداعى جىلدىڭ 2-توقسانىندا ناتيجەلى جۇمىسپەن قامتۋدىڭ ەسەبىنەن ونىڭ ۇلعايعانىن جانە ناتيجەسىز جۇمىسپەن قامتۋدىڭ ايتارلىقتاي قىسقارعانىن كورسەتەدى.
ءوز كەزەگىندە ابسوليۋتتىك ماندە ءبىر جىل ىشىندە ءوزىن-وزى ناتيجەسىز جۇمىسپەن قامتىعانداردىڭ سانى ۇشتەن بىرىنە نەمەسە 92،9 مىڭ ادامعا تومەندەپ، 156 مىڭ ادامدى قۇرادى. ال ءوزىن-وزى جۇمىسپەن قامتىعانداردىڭ جالپى سانىنداعى ناتيجەسىز جۇمىسپەن قامتۋ ۇلەسى ءبىر جىلدا 4،8 پ.ت. (12،2%-دان 7،4%-عا دەيىن) قىسقاردى.
«ءوزىن-وزى جۇمىسپەن قامتۋدىڭ ءوسىپ كەلە جاتقان ترەندىمەن قاتار جالدامالى قىزمەتكەرلەردىڭ قۇرىلىمدىق قۇرامى دا وزگەرۋدە، وندا جالدامالى ەڭبەك سيپاتتامالارىنىڭ كورپوراتيۆتىك جۇمىسپەن قامتۋدان اۋىتقۋ جاعىنا قاراي وزگەرۋ ءۇردىسى بايقالادى. بۇل، اسىرەسە، جىلدىق ديناميكادا بايقالادى. مىسالى، وتكەن جىلدىڭ ۇقساس كەزەڭىمەن سالىستىرعاندا ۇيىمدارداعى جالدامالى جۇمىسپەن قامتۋ (بارلىق جالدامالى ەڭبەكتىڭ 87%-ى) 0،4% - عا (-23،4 مىڭ ادام) قىسقاردى، بۇل رەتتە ازاماتتىق-قۇقىقتىق سيپاتتاعى شارت نەگىزىندە جالداۋ ايتارلىقتاي ۇلعايدى (+60،1%). ءقازىر كەلىسىمشارت بويىنشا 56،9 مىڭ ادام جۇمىسپەن قامتىلعان.»، – دەپ اتاپ ءوتتى ق ر ەڭبەكمينى ەڭبەك رەسۋرستارىن دامىتۋ ورتالىعىنىڭ ستراتەگيا جانە جوبالىق باسقارۋ دەپارتامەنتىنىڭ ديرەكتورى الەكساندرا مولچانوۆسكايا.
وتكەن توقسانمەن سالىستىرعاندا، قاشىقتىقتان جۇمىس ىستەيتىندەردىڭ سانى 75،2 مىڭ ادامعا دەيىن 2%-عا ارتتى. الدىڭعى كەزەڭ سياقتى، قاشىقتىقتان جۇمىس جاسايتىن جۇمىسكەرلەردىڭ كوپشىلىگى ايەلدەر (65%) جانە قالا تۇرعىندارى (64%) بولىپ تابىلادى، الايدا ۇلەستىك ءبولىنىس وزگەرۋ تەندەنسياسىن كورسەتەدى، وندا ەر ادامدار 5%-عا، ال اۋىل تۇرعىندارى 6%-عا كوپ بولدى.