قازاقستان پرەمەر-مينيسترىنىڭ ءبىرىنشى ورىنباسارى رومان سكليار قاتتى پايدالى قازبالار مەن كومىرسۋتەك شيكىزاتىنىڭ كەن ورىندارىن تەكسەرۋ ماسەلەسى جونىندە كەڭەس وتكىزدى.
ۇكىمەت جەر قويناۋىن پايدالانۋشىلارعا بەرىلگەن كەلىسىمشارتتار مەن ليسەنزيالاردى قايتا قاراۋ بويىنشا جۇمىس جۇرگىزىپ جاتىر، دەپ حابارلايدى Almaty-akshamy.kz قازاقپاراتقا سىلتەمە جاساپ.
تالداۋ بارىسىندا 2022 جىلى ۋاكىلەتتى ورگاندار قاتتى پايدالى قازبالار بويىنشا 115 كەلىسىمشارت پەن 198 ليسەنزيانى، سونداي-اق كومىرسۋتەك شيكىزاتى بويىنشا 12 كەلىسىمشارتتى بۇزدى.
ناتيجەسىندە مەملەكەتتىك قورعا التىن، كومىر، تەمىر، مىس، بوكسيت، پوليمەتالل جانە ت.ب. كەن ورىندارى قايتارىلدى، ولار كەيىننەن ستراتەگيالىق ينۆەستورلارعا بەرۋ ءۇشىن اۋكسيونعا شىعارىلادى.
2022 جىلى وتكىزىلگەن اۋكسيونداردىڭ قورىتىندىسى بويىنشا بيۋدجەتكە 26 ملرد تەڭگە سوماسىنا قول قويۋ بونۋسى تولەندى جانە كومىرسۋتەك شيكىزاتى بويىنشا گەولوگيالىق بارلاۋعا 50 ملرد تەڭگەدەن استام ينۆەستيسيا مالىمدەلدى.
جەر قويناۋىن پايدالانۋ قۇقىعىن ۇسىنۋعا ارنالعان اۋكسيونعا بارلىق مۇددەلى ينۆەستور قاتىسا الادى. اۋكسيونداردى وتكىزۋ تۋرالى اقپارات مىندەتتى تۇردە رەسپۋبليكالىق باسپا باسىلىمدارىندا جانە مەملەكەتتىك ورگانداردىڭ ينتەرنەت-رەسۋرستارىندا جاريالانادى.
سونىمەن قاتار ۋاكىلەتتى ورگاندار قارجىلىق مىندەتتەمەلەردى بۇزعان جەر قويناۋىن پايدالانۋشىلارعا ايىپپۇل سانكسيالارىن قولدانۋ بويىنشا جۇمىس جۇرگىزىپ جاتىر.
2022 جىلى مەملەكەت كىرىسىنە قاتتى پايدالى قازبالار بويىنشا 331 ملن تەڭگە مولشەرىندە تۇراقسىزدىق ايىبى ءوندىرىلدى، سونداي-اق كومىرسۋتەك شيكىزاتى سالاسىنداعى 9 كەلىسىمشارت بويىنشا 1،8 ملرد تەڭگەگە بەرەشەك وتەلدى.