جەتىسۋ اۋدانىنا قاراستى №103 مەكتەپ-گيمنازياسىندا «وقۋ ۇدەرىسىندە ينتەراكتيۆتى ادىستەردى پايدالانۋ» اتتى قالالىق سەمينار ءوتتى.
سەميناردى №103 مەكتەپ-گيمنازيا ديرەكتورى ايگۇل ءومىرزاقوۆا اشىپ، ءبىلىم بەرۋدەگى يننوۆاسيالىق سيفرلىق ساۋاتتىلىقتى زامان تالابىنا ساي ينتەگراسيالاۋ مەن وزىق پەداگوگيكالىق تاجىريبە الاڭىن قۇرۋعا شاقىردى. الدىمەن اتالمىش مەكتەپ ديرەكتورىنىڭ ورىنباسارى ءۇمىت باتىرحانوۆا قاتىسۋشىلاردى شارانىڭ ماقساتى مەن باعىتى، جالپى وتكىزىلىپ وتىرعان سەميناردىڭ جۇمىس تارتىبىمەن تانىستىردى.قالا پەداگوگتەرىنىڭ باسىن قوسقان جيىنعا «ورلەۋ» الماتى قالاسى بويىنشا كاسىبي دامۋ ينستيتۋتى وقىتۋشىلارى ساندۋگاش ورالحان قىزى، گۇلبالا كەنىشتاي قىزى، ايگۇل امانجول قىزى، نازەركە ءالىمباي قىزى، ماگريپا اسقار قىزى مەن «قالالىق ءبىلىم بەرۋدەگى جاڭا تەحنولوگيالاردىڭ عىلىمي-ادىستەمەلىك ورتالىعىنىڭ» ادىسكەرى كامشات قىدىرباي قىزى قاتىسىپ، باعىت-باعدار بەردى.
سەمينار بارىسىندا گۇلبالا كەنىشتاي قىزى «رISA بويىنشا دەڭگەيلىك تاپسىرمالار قۇراستىرۋ» تاقىرىپتارىندا سەمينار-ترەنينگ وتكىزدى. «بيىلعى جىلى رISA زەرتتەۋلەرى قازاقستاندا وتكىزىلەدى. وعان 15 جاستاعى ءبىلىم الۋشىلار قاتىسادى. بۇل باعدارلامانىڭ ەرەكشەلىگى – مەكتەپتە العان بىلىمدەرىن قولدانا وتىرىپ، ومىرلىك جاعداياتتاردى شەشە الۋىندا. بۇگىنگى كۇننىڭ تالابى وسى. سوعان سايكەس، وقۋ ساۋاتتىلىعىندا رISA-نىڭ 6 دەڭگەيلى تاپسىرمالارىن ورىنداي الىپ، اشىق دەرەككوزدەردەن الىنعان اقپاراتتى تالداي ءبىلۋى ءتيىس. بۇل ءماتىندى دۇرىس تاڭداۋ، وقۋ ساۋاتتىلىعىنا ءمان بەرۋ، تاپسىرمانى دۇرىس بەرە ءبىلۋ» دەپ تۇجىرىمدادى.
سونىمەن قاتار، پەداگوگتەر پراكتيكالىق جۇمىس بارىسىندا ينتەراكتيۆتى وقىتۋدىڭ ءارتۇرلى قۇرالدارىن سارالاپ، ساباق مازمۇنىن سيفرلىق پلاتفورمالار نەگىزىندە قۇرۋدى جانە اقپاراتتىڭ ساپاسىن باعالاۋدى، اقپاراتتىڭ سەنىمدىلىگىن انىقتاۋدى، رISA بويىنشا دەڭگەيلىك تاپسىرمالار قۇرۋدى ۇيرەندى.
سەمينار بارىسىندا ينتەراكتيۆتى ادىستەر مەن سيفرلىق قۇرالداردى وقۋ ۇدەرىسىنە ءتيىمدى ەنگىزۋ جولدارى قاراستىرىلىپ، №103 مەكتەپ-گيمنازيا پەداگوگتەرى ءپان مۇعالىمدەرىنىڭ سيفرلىق داعدىلارىن دامىتۋعا باعىتتالعان شەبەرلىك ساباقتارىن وتكىزدى.
سەمينارعا قاتىسۋشىلار كەرى بايلانىس جاساپ، قاجەتتى پلاتفورمالارمەن جۇمىس جاساۋعا، زاماناۋي ءبىلىم بەرۋ ادىستەمەلەرىن جيناقتاۋعا جانە جاڭا تەحنولوگيالار بويىنشا پراكتيكالىق تاجىريبە الماسۋعا كەڭىنەن مۇمكىندىكتەر جاساعان مەكتەپ اكىمشىلىگىنە ريزاشىلىقتارىن ءبىلدىردى.
سەمينار جۇمىسىن «كاسىبي دامۋ ينستيتۋتىنىڭ» اعا وقىتۋشىسى ساندۋعاش ورالحان قىزى «اقپاراتتىق جانە مەدياساۋاتتىلىق – بۇل قازىرگى زامانداعى اقپاراتتى ءتيىمدى تابۋ، تالداۋ، پايدالانۋ جانە قۇرۋداعى ماڭىزدى قابىلەتى بولىپ تابىلادى. پەداگوگتەر وقۋشىلارعا اقپاراتتىڭ ساپالى جانە شىنايىلىعىن انىقتاۋدى، دۇرىس پايدالانۋدى جانە اقپاراتتىق قاۋىپتەردەن قورعانۋدى ۇيرەتۋى كەرەك. اقپاراتتىق جانە مەدياساۋاتتىلىق ءبىلىم بەرۋ پروسەسىن جەتىلدىرۋگە، وقۋشىلاردىڭ جاڭا بىلىمدەردى الۋ جانە سىني ويلاۋ قابىلەتتەرىن دامىتۋعا كومەكتەسەدى. قازىرگى زامانعى تەحنولوگيالاردىڭ دامۋى ءارتۇرلى اقپارات كوزدەرىن كەڭىنەن پايدالانۋدى تالاپ ەتەدى. اقپاراتتى دۇرىس قولدانۋ شىعارماشىلىق قابىلەتتەردى ارتتىرىپ، كاسىبي دەڭگەيدە وسۋگە ىقپال ەتەدى. بۇل جەردە اقپاراتتىق ساۋاتتىلىق كومەككە كەلەدى. سوندىقتان دا، كەز-كەلگەن اقپاراتتى دۇرىس، ساۋاتتى پايدالانۋ، اقپاراتتى جيناقتاۋعا، تالداۋعا جانە ۇسىنۋعا ارنالعان قاجەتتى داعدىلار قازىرگى پەداگوگتەرىمىزدە بولۋ كەرەك»- دەگەن سوزىمەن تۇيىندەدى.