9-10 ماۋسىم ارالىعىندا وزبەكستان مەملەكەتىندە «وزبەكستان - باقىتتى ۇلتتار مەكەنى» اتتى رەسپۋبليكالىق قازاق ۇلتتىق ورتالىعىنىڭ 30 جىلدىق مەرەيتويى ءوتتى، دەپ حابارلايدى Almaty-akshamy.kz Inform.kz-كە سىلتەمە جاساپ.
شارا وزبەكستان رەسپۋبليكاسى تاۋەلسىزدىك العاننان قازىرگى كۇنگە دەيىن كوپتەگەن ۇلتتاردىڭ ءبىر اسپان استىندا بەيبىت، ءبىر بولىپ ءومىر سۇرۋلەرىنە جاعداي جاساپ، «ەتنيك» سوزىنە لايىقتى دامىتۋ مەن ۇلتارالىق قاتىناستاردى نىعايتۋدا 30 جىل ىشىندە جاسالعان جۇمىستارمەن تانىستىرۋ ماقساتىندا ۇيىمداستىرىلدى. مەرەيتويعا وزبەكستان رەسپۋبليكاسى مينيسترلەر كابينەتى قۇزىرىنداعى ۇلتارالىق قاتىناستار جانە شەت مەملەكەتتەرمەن دوستىق بايلانىستارى كوميتەتىنىڭ ءتوراعاسى رۋستامبەك كۋربانوۆ، ق ر وزبەكستانداعى توتەنشە جانە وكىلەتتى ەلشىسى دارحان ساتىبالدى، وزبەكستانداعى رەسپۋبليكالىق قازاق مادەني ورتىلىعىنىڭ باسشىسى ۇسەنوۆ سەرىك، «وتانداستار قورى» قەاق پرەزيدەنتى ابزال ساپاربەك ۇلى مەن وزبەكستان ايماعىنداعى بارلىق اۋداندارىنداعى قازاق مادەني ورتالىقتارىنىڭ باسشىلارى مەن وزبەكستاندا تۇراتىن وزگە ۇلت ورتالىقتارىنىڭ وكىلدەرى قاتىستى.
بۇل ماڭىزدى شارا قازاقتىڭ قارلىعاش ءبيى تولە ءبيدىڭ جاتقان جەرىنە زيارات ەتىپ، قۇران باعىشتاۋدان باستاۋ الدى. مىرزا ۇلىقبەك اتىنداعى وزبەكستان ۇلتتىق ۋنيۆەرسيتەتىندە ورتالىقتىڭ 30 جىلدىعىنا ارنالعان: «وزبەكستان قازاقتارى: ەكونوميكا، عىلىم جانە مادەنيەت» اتتى عىلىمي پراكتيكالىق كونفەرەنسياسى ۇيىمداستىرىلدى.
كونفەرەنسيادا «ورتالىقتىڭ 30 جىلدا اتقارعان يگى شارالارى»، «قازاقستان مەن وزبەكستان اراسىنداعى ىڭتىماقتاستىقتىڭ كەلەشەگى»، «قازاقستان حالىقتارى اسسامبلەياسىنىڭ ۇلتارالىق قاتىناستاردى دامىتۋداعى ءرولى» مەن «شەت مەملەكەتتەرمەن دوستىق بايلانىستاردا قانداستاردىڭ ورنى» اتتى تاقىرىپتار قوزعالدى. سونىمەن قاتار، مەكەمباي ومار ۇلىنىڭ «تاشكەنت قازاقتارى تاريحى جانە مادەني ءومىرى» اتتى كىتاپ تۇساۋكەسەرى ءوتتى.
ءىس-شارا بارىسىندا بىرنەشە ماڭىزدى كەزدەسۋلەر ءوتتى. اتاپ ايتساق، وتانداستار قورى دەلەگاسياسى وزبەكستان رەسپۋبليكاسى مينيسترلەر كابينەتى قۇزىرىنداعى ۇلتارالىق قاتىناستار جانە شەت مەملەكەتتەرمەن دوستىق بايلانىستار كوميتەتى جانە وزبەكستان «VATANDOSHLAR jamoat fondi» باسشىلىعىمەن كەزدەسىپ، ەكى جاقتى بىرلەسكەن جوبالار مەن تاجىريبە الماسۋ تاقىرىپتارى تالقىلاندى.