وزبەكستان دەنساۋلىق ساقتاۋ مينيسترلىگىنىڭ مالىمەتىنشە، رەسپۋبليكا بۇگىنگە دەيىن رەسەيلىك پرەپاراتتىڭ 370 مىڭ دوزاسىن العان، سونىڭ ىشىندە ءبىرىنشى كومپونەنت – 230 مىڭ دوزا، ەكىنشى كومپونەنت – 140 مىڭ دوزا بولعان.
وزبەكستان رەسپۋبليكاسىندا «سپۋتنيك V» ۆاكسيناسى ەكىنشى كومپونەنتىنىڭ تاپشىلىعى بار، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قازىرگى كەزدە ءبىرىنشى دوزانى 212 818 ادام العان، ەكىنشى كومپونەنت 128 442 ادامعا سالىندى. قوس كومپونەنت سانىن تەڭەستىرۋ ءۇشىن ەلگە ۆاكسينانىڭ ءالى 90 مىڭ دوزاسى جەتكىزىلۋى ءتيىس. الداعى كۇندەرى وزبەكستان «سپۋتنيك V» ۆاكسيناسى ەكىنشى كومپونەنتىنىڭ 90 مىڭ دوزاسىن كۇتىپ وتىر»، - دەپ حابارلادى ۆەدومستۆونىڭ باسپا ءسوز قىزمەتىنەن.
مينيسترلىكتە رەسەيلىك پرەپاراتتى قابىلداۋ اراسىنداعى ۋاقىت جيىلىگىن 21 كۇننەن 90 كۇنگە دەيىن ۇزارتۋعا بولاتىنىن قوسىپ ءوتتى.
ەسكە سالا كەتسەك، شىلدە ايىنىڭ سوڭىندا وزبەكستانداعى «Jurabek Laboratories» زاۋىتىندا «سپۋتنيك V» ۆاكسيناسى ءبىرىنشى كومپونەنتىنىڭ ءبىرىنشى پارتياسى قۇيىلعان.
ءبىرىنشى كەزەڭدە رەسەيلىك شيكىزاتتان جاسالعان پرەپاراتتىڭ 2 ميلليونعا دەيىن دوزاسىن ءوندىرۋ جوسپارلانىپ وتىر. كەيىننەن اتالعان پرەپارات ءوندىرىسىنىڭ تولىق سيكلى رەتكە كەلتىرىلەدى.