وزبەكستاندا ليسەنزياسىز كۋرستار مەن ترەنينگتەر ۇيىمداستىراتىن تۇلعالارعا قارسى كۇرەس كۇشەيتىلەدى. ەلدە مۇنداي قىزمەتپەن اينالىساتىن ادامداردى جاۋاپكەرشىلىككە تارتۋ ءۇشىن زاڭ قابىلداندى. بۇل شارالار اعارتۋشىلىق قىزمەتتى زاڭدى جولمەن جۇزەگە اسىرۋدى رەتتەۋ ماقساتىندا ەنگىزىلمەك، دەپ حابارلايدى aqshamnews.kz
2023 جىلى وزبەكستان پارلامەنتىنىڭ زاڭ شىعارۋشى پالاتاسى «وزبەكستان رەسپۋبليكاسىنىڭ كەيبىر زاڭنامالىق اكتىلەرىنە اعارتۋشىلىق قىزمەتتى جۇزەگە اسىرۋ ءتارتىبىن انىقتاۋعا باعىتتالعان وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءۇشىنشى وقىلىمدا قابىلدادى. زاڭ جوباسىن ەلدەگى اعارتۋشىلىق قىزمەتتىڭ رەتتەلۋىن قامتاماسىز ەتۋ ماقساتىندا دەپۋتاتتار توبى ازىرلەگەن بولاتىن.
قۇجاتتى تالقىلاۋ بارىسىندا حالىقتىڭ ءارتۇرلى توپتارىن، اسىرەسە جاستاردى، ەشقانداي پراكتيكالىق ماڭىزى جوق اقپاراتتىق ونىمدەرمەن قامتاماسىز ەتەتىن ءىس-شارالاردىڭ كوبەيۋى اتاپ ءوتىلدى.
مىسالى، 2022 جىلى ەلدە ليسەنزياسىز كۋرستار مەن ترەنينگتەر ۇيىمداستىرۋعا قاتىستى 200-دەن استام شاعىم تىركەلگەن. وسىنداي ءىس-شارالار كەزىندە جالعان اقپارات تاراتۋ، قوعامعا جات جانە ءقاۋىپتى ءدىني كوزقاراستاردى ناسيحاتتاۋ، كوپ ايەل الۋشىلىقتى جانە مورالدىق ازعىندىقتى دارىپتەۋ جاعدايلارى ورىن العان.
سونىمەن قاتار، ينفوسىعاندار دەپ اتالاتىن ادامدار جالعان اقپارات تاراتىپ، زاڭسىز جولمەن پايدا تابۋ ماقساتىندا ءوزىن ينفوبيزنەسمەن، بيزنەس-ترەنەر نەمەسە موتيۆاتور رەتىندە كورسەتىپ، حالىقتى الدايدى.
مىسالى، وتكەن جىلى ينفوسىعاندار ۇيىمداستىرعان 50-گە جۋىق كۋرسقا قاتىسۋشىلاردىڭ اقشاسى قايتارىلماي، وقىتۋ ساپاسى دا سىن كوتەرمەگەن.
جاڭا زاڭعا سايكەس، اعارتۋشىلىق قىزمەتتى ليسەنزياسىز جۇزەگە اسىرعاندارعا اكىمشىلىك جاۋاپكەرشىلىك قاراستىرىلادى. وزبەكستاننىڭ «اكىمشىلىك جاۋاپكەرشىلىك تۋرالى كودەكسىنە» ەنگىزىلگەن جاڭا باپ ليسەنزياسىز قىزمەت كورسەتەتىن ادامدارعا ايىپپۇل سالۋدى نەمەسە قىزمەتىن توقتاتۋدى تالاپ ەتەدى. ايىپپۇل مولشەرى دە ايتارلىقتاي جوعارى بولۋى مۇمكىن: 10-نان 100 بازالىق ەسەپتىك كورسەتكىشكە دەيىن، بۇل شامامەن 300-دەن 3000 اقش دوللارىنا دەيىنگى سوما.
سونداي-اق «ءبىلىم تۋرالى» زاڭعا تولىقتىرۋلار ەنگىزىلدى. وندا اعارتۋشىلىق قىزمەتتى جۇزەگە اسىرا الاتىن ورگاندار مەن شارتتار كورسەتىلگەن. اسىرەسە، ءدىني جانە قوعامعا جات يدەيالاردى ناسيحاتتايتىن ادامدارعا اعارتۋشىلىق قىزمەتپەن اينالىسۋعا تىيىم سالىندى. زاڭ سونىمەن قاتار زاڭدى تۇلعالارعا اعارتۋشىلىق قىزمەت جۇرگىزۋ ءۇشىن ارنايى ليسەنزيا الۋ مىندەتتەمەسىن ەنگىزەدى.
مۇنىمەن قاتار، وزبەكستان ۇكىمەتىنە اعارتۋشىلىق قىزمەتتى قاداعالاۋ جانە باقىلاۋ بويىنشا قوسىمشا وكىلەتتىكتەر بەرىلدى. زاڭ كۇشىنە ەنگەننەن كەيىن ۇكىمەت ارنايى ەرەجەلەر ازىرلەيدى، وندا مۇنداي قىزمەتتى جۇزەگە اسىرۋ ءتارتىبى مەن تالاپتارى تولىق كورسەتىلەدى.
دەپۋتاتتاردىڭ پىكىرىنشە، بۇل زاڭنىڭ قابىلدانۋى ليسەنزياسىز اعارتۋشىلىق قىزمەتتىڭ بەيبەرەكەتسىزدىگىن توقتاتادى جانە زاڭسىز قىزمەتپەن اينالىساتىن ادامداردىڭ جاۋاپكەرشىلىگىن كۇشەيتەدى.
وزبەكستاندا ليسەنزياسىز اعارتۋشىلىق قىزمەتكە قارسى قابىلدانعان جاڭا زاڭنىڭ تاجىريبەسى قازاقستان ءۇشىن دە وزەكتى بولارى انىق. سوڭعى جىلدارى ەلىمىزدە دە ءتۇرلى ترەنينگتەر، كۋرستار مەن سەمينارلار كوبەيىپ، ولاردىڭ كوپشىلىگى ليسەنزياسىز جانە ساپاسىز تۇردە جۇرگىزىلۋدە. مۇنداي ءىس-شارالاردا شىنايى ءبىلىم بەرۋدەن گورى، زاڭسىز پايدا تابۋدى كوزدەيتىن جالعان اقپارات تاراتاتىن ينفوسىعاندار دا كەزدەسەدى. بۇل ءۇردىس قوعامنىڭ سەنىمىن جوعالتىپ، الەۋمەتتىك تۇراقتىلىققا دا كەرى اسەرىن تيگىزەدى.
قازاقستاندا دا اعارتۋشىلىق قىزمەتتى زاڭدى تۇردە رەتتەۋ جانە ليسەنزيالاۋ جۇيەسىن ەنگىزۋ قاجەتتىگى تۋىنداپ وتىر. بۇل ازاماتتاردىڭ ساپالى ءبىلىم الۋىنا، دەسترۋكتيۆتى يدەيالاردان ساقتانۋعا جانە قوعامداعى الداۋشىلىققا قارسى تۇرۋعا كومەكتەسەدى. ليسەنزياسىز قىزمەت كورسەتكەن تۇلعالارعا قاتىستى زاڭنامانى كۇشەيتۋ ارقىلى مەملەكەت زاڭسىز جولمەن پايدا تابۋدى كوزدەيتىندەرگە دە توسقاۋىل قويار ەدى.