وزبەكستاندا ەكپە سالدىرماعاندار جۇمىستان شەتتەتىلەدى. ءتيىستى زاڭعا جۋىردا كورشى ەل پرەزيدەنتى شاۆكات ميرزيويەۆ قول قويدى، دەپ حابارلايدى almaty-akshamy.kz 24.kz سىلتەمە جاساپ.
تاعى جاڭاشىلدىققا سايكەس، باس مەملەكەتتىك سانيتارلىق دارىگەر ينفەكسيالىق اۋرۋلار ورشىگەن جاعدايدا، مىندەتتى ۆاكسينالاۋ شاراسىن ەنگىزۋى مۇمكىن. وزبەكستانداعى قازىرگى ەپيداۋحال اسا ءماز ەمەس.
نەگىزى يممۋنداۋ شاراسى اياسىندا وزبەكستاندا 4 ءتۇرلى ۆاكسينا قولدانىلۋدا. ولار: COVAX باعدارلاماسى اياسىندا ەلگە جەتكىزىلگەن Aztra Zeneca مەن Moderna ەكپەلەرى جانە رەسەيلىك سپۋتنيك V مەن قىتايلىق ۆاكسينا ZFUZ. قازىرگى تاڭدا ەلدە ەكپە العان ازاماتتاردىڭ سانى 8 ملن 300 مىڭنان استى.
جالپى، مىندەتتى ەكپە جاساتۋدان باس تارتا الاتىن ازاماتتاردىڭ دا ساناتى بار. بۇل تىزىمگە مەديسينالىق كورسەتكىشتەرگە بايلانىستى ۆاكسينا جاساتۋعا بولمايتىندار، 6 اي ىشىندە كوروناۆيرۋسپەن اۋىرىپ شىققاندار مەن جۇكتى ايەلدەر كىرەدى. ولار مىندەتتى تۇردە پتر تەست تاپسىرىپ وتىرۋلارى قاجەت. بۇل تەست وزبەكستان ازاماتتارى ءۇشىن تەگىن جاسالادى.