اتالمىش ءدارىنى ىشكەن 18 بالا كوز جۇمعان.
وزبەكستاننىڭ مەملەكەتتىك قاۋىپسىزدىك قىزمەتى 18 بالانىڭ تۇماۋعا قارسى ءۇندى دارىسىنەن كەيىن كوز جۇمۋ وقيعاسىنا قاتىستى قىلمىستىق ءىس قوزعادى، دەپ حابارلايدى Almaty-akshamy.kz.
وزبەكستاننىڭ دارىلىك زاتتاردى ساراپتاۋ جانە ستاندارتتاۋ مەملەكەتتىك ورتالىعىنىڭ قورىتىندىسىنا سايكەس، «دوك-1 ماكس» ءشارباتى بەلگىلەنگەن تالاپتارعا ساي بولماي شىققان.
«دوك-1 ماكس» ءشارباتىندا كەزدەسەتىن ەتيلەنگليكول زاتى ناۋقاستىڭ دەنساۋلىعىنا كەرى اسەرىن تيگىزەدى. قازىرگى ۋاقىتتا يمپورتتاۋشى كومپانيا «Quramax Medical» جشق جانە «دارىلىك زاتتاردى ستاندارتتاۋ عىلىمي ورتالىعى» جشق لاۋازىمدى تۇلعالارىنا قاتىستى قىلمىستىق ءىس قوزعالدى. كۇدىكتىلەر ۋاقىتشا ۇستاۋ يزولياتورىنا قامالدى»، - دەلىنگەن وزبەكستان مەملەكەتتىك قاۋىپسىزدىك قىزمەتى حابارلاماسىندا.
ەسكە سالساق، 27 جەلتوقساندا وزبەكستان دەنساۋلىق ساقتاۋ مينيسترلىگى «دوك-1 ماكس» پرەپاراتىن قابىلداعان 18 بالانىڭ كوز جۇمعانىن راستايتىن تەكسەرۋ ناتيجەسىن جاريالادى. ال قازاقستان بيلىگى بۇل ءدارىنىڭ ەلدە تىركەلمەگەنىن جانە ساتىلىمدا جوق ەكەنىن حابارلادى.