قازاقستان 34 شەت مەملەكەتپەن سوتتالعانداردى بەرۋ تۋرالى 72 شارت جاساعان. بۇل تۋرالى Almaty-akshamy.kz قازاقپاراتقا سىلتەمە جاساپ حابارلادى.
بارلىعى 72 شارتتىڭ ىشىندە 29 – قىلمىستىق ىستەر بويىنشا ءوزارا قۇقىقتىق كومەك تۋرالى، 21 – ۇستاپ بەرۋ تۋرالى، 22 – سوتتالعانداردى بەرۋ تۋرالى كەلىسىم بار.
بۇل باعىتتا قازاقستان اقش، جۇڭگو، ۇلىبريتانيا، ءۇندىستان، ءباا، تمد جانە باسقا دا ەلدەرمەن سەرىكتەس.
«ءبىزدىڭ ەلىمىز سولتۇستىك جانە وڭتۇستىك امەريكانىڭ 26 ەلىن قامتيتىن ءۇش امەريكاارالىق كونۆەنسيالاردىڭ (ۇستاپ بەرۋ تۋرالى، قىلمىستىق ىستەر بويىنشا قۇقىقتىق كومەك تۋرالى، شەتەلدە قىلمىستىق جازاسىن وتەۋ تۋرالى) تولىققاندى قاتىسۋشىسى بولىپ تابىلادى. قازىرگى ۋاقىتتا فرانسيا جانە وزبەكستانمەن ەكى شارت ق ر پارلامەنتى سەناتىندا راتيفيكاسيالاۋدان وتۋدە. وزبەكستانمەن سوتتالعان ادامداردى بەرۋ تۋرالى شارت ولارعا باس بوستاندىعىنان ايىرۋ تۇرىندەگى جازاسىن ءوز وتانىندا ودان ءارى وتەۋگە مۇمكىندىك بەرەدى. ءقازىر قازاقستاندىق كولونيالاردا وزبەكستاننىڭ 500-گە جۋىق ازاماتى جازاسىن وتەپ جاتىر، ال وزبەكستاندا ءبىزدىڭ 20 ازامات جازاسىن وتەۋدە»، - دەلىنگەن پروكۋراتۋرا حابارلاماسىندا.