ءوز جۇمىس ورنىنا ۇرلىققا تۇسكەن كۇدىكتى ءۇش جىلعا سوتتالدى

كاسسادان 6 ملن تەڭگەنى قولدى قىلعان.

تۇركىستان وبلىسىندا ءوز جۇمىس ورنىنا ۇرلىققا تۇسكەن كۇدىكتى ءۇش جىلعا سوتتالدى، دەپ حابارلايدى Almaty-akshamy.kz.

وقيعا تامىز ايىندا جەتىساي اۋدانىندا ورىن العان. ءوز جۇمىس ورنىنا ۇرلىققا تۇسكەن جىگىت، كاسسادان 6 ملن تەڭگەنى قولدى قىلعان.

پوليسەيلەردىڭ تەرگەۋ ارەكەتتەرى بارىسىندا كۇدىكتىنىڭ بۇرىن سول جەردە جۇك تاسۋشى بولىپ جۇمىس ىستەگەنى انىقتالدى. ول سول كۇنى قويما ىشىنە كىرىپ، 5 ساعاتتاي جۇمىسشىلاردىڭ ۇيىنە قايتقانىن كۇتىپ وتىرعان. ىشتە ەشكىمنىڭ قالماعانىنا كوز جەتكىزگەننەن سوڭ، سۋسىندار قويماسىنىڭ تەرەزەسىنەن كاسساعا ءوتىپ، 6 ملن تەڭگەنى سومكەسىنە سالىپ الىپ كەتكەن.

«اتالعان ءىس بويىنشا جان-جاقتى تەكسەرۋ شارالارىن اتقارىپ، دالەلدەمەلەردى جيناقتاعان پوليسەيلەر ءىس قۇجاتتارىن ايىپتاۋ اكتىسىمەن بىرگە سوتقا جولدادى. ناتيجەسىندە سوت ۇكىمىمەن 23 جاستاعى كۇدىكتى ق ر كق-نىڭ 188-بابى 3-بولىگىمەن كىنالى دەپ تانىلىپ، وعان قاتىستى 3 جىل 3 اي مەرزىمگە باس بوستاندىعىنان شەكتەۋ جازاسى تاعايىندالدى»، - دەلىنگەن تۇركىستان وبلىسى پوليسيا دەپارتامەنتى تاراتقان اقپاراتتا.