جەتىنشى اۋرۋحانا دارىگەرلەرى مۇگەدەك ارباعا تاڭىلعان زەينەتكەردى اياققا تۇرعىزدى
64 جاستاعى ۇيىمحان قاليبەك بەس جىلدان بەرى ريەۆماتويدتى پوليارتريتپەن اۋىرادى. ءوزىنىڭ ايتۋىنشا، كونسەرۆاتيۆتى ەم-دوم ەشقانداي ناتيجە بەرمەگەن. سالدارىنان سوڭعى ءۇش جىلدا اياقتان قالىپ، مۇگەدەك ارباعا تاڭىلعان ناۋقاسقا «جۇيەلى وستەوپوروز، 3-4-دەڭگەيلى گونارتروز» دەگەن دياگنوزبەن حيرۋرگيالىق وتا جاساۋ تۋرالى شەشىم قابىلداندى. بۇل تۋرالى الماتىداعى №7 قالالىق كلينيكالىق اۋرۋحانانىڭ باسپا ءسوز قىزمەتى حابارلادى.
قىتايدا تۋىپ-وسكەن زەينەتكەر وسىدان بىرنەشە جىل بۇرىن شىعىس قازاقستان وبلىسىنا كوشىپ كەلگەن. قازاقستان مەن قحر-نىڭ ءبىرقاتار كلينيكالارىنا قارالىپتى. ءبىرى اۋقىمدى ءارى كۇردەلى وتانى جاساۋدان باس تارتسا، ەندى ءبىرى قوماقتى قاراجات سۇراعان. ناۋقاس جەتىنشى اۋرۋحانانىڭ ورتوحيرۋرگيا بولىمشەسىنە جوسپارلى تۇردە جاتقىزىلدى. وعان مىندەتتى الەۋمەتتىك مەديسينالىق ساقتاندىرۋ قاراجاتى ەسەبىنەن تەگىن وتا جاسالدى.
«ريەۆموتويدتى پوليارتريت پەن اسقىنعان وستەوپوروز سالدارىنان سۇيەكتىڭ مورت سىنۋ ءقاۋپى جوعارى بولدى. سوعان قاراماستان ءبىز تاۋەكەلگە بەل بۋىپ، كۇردەلى وپەراسيا جاسادىق. تىزە بۋىنىنا ارتقى تۇراقتاندىرعىشى بار ەندوپروتەز ورناتتىق. وپەراسيا جوسپارعا ساي ءساتتى ءوتتى. پاسيەنت ەرتەڭىنە اياققا تۇردى»، - دەيدى اۋرۋحانانىڭ ورتوپەد-دارىگەرى ەرلان اميروۆ.
ايتۋىنشا، وتادان كەيىن ءۇش جىل بويى قوزعالىسسىز قالعان اياقتى بۇگۋ، قيمىلداتۋ ءبىرشاما قيىندىق تۋدىرعان. ورتوحيرۋرگيا بولىمشەسىندە جۇرگىزىلگەن ەرتە وڭالتۋ شاراسىنىڭ ارقاسىندا وپەراسيا ناتيجەسى نىعايتىلىپ، پاسيەنت اياققا تۇردى. اربامەن جەتكىزىلگەن ول اۋرۋحانا ەسىگىنەن ءوز اياعىمەن شىعىپ كەتتى، دەيدى مامان.
ۇيىمحان اپانىڭ ۇزىلگەن ءۇمىتىن جالعاعان كلينيكاعا ايتار العىسى شەكسىز.
«ايەلىمنىڭ 3 جىلدان بەرى جۇرە الماي، مۇگەدەك ارباعا تاڭىلعانى جانىما باتاتىن. قالقامانداعى №7 اۋرۋحانا قىزمەتكەرلەرىنىڭ ارقاسىندا وتا ءساتتى شىقتى. ءۇش-اق كۇننەن كەيىن جانىن جەگەن اۋرۋىنان ارىلىپ، قايتادان اياققا تۇردى. ءوز اياعىڭمەن ءجۇرىپ-تۇرعان دەگەن باقىت قوي. سونداي قۋانىش سىيلاعان دارىگەرلەرگە كوپ راقمەت!»، - دەيدى پاسيەنتتىڭ جۇبايى.