وتكەن جىلى قازاقستاندا اۆتوموبيل ءوندىرىسى وسكەن

ءوندىرىس كولەمى 24% وسكەن.

قازاقستاندا 2021 جىلى اۆتوموبيل ءوندىرىسى 24% وسكەن. بۇل تۋرالى ق ر پرەمەر-مينيسترى ءاليحان سمايىلوۆتىڭ قازاقستان ماشينا جاساۋشىلار وداعى باسقارماسىنىڭ ءتوراعاسى مەيرام پىشەمبايەۆپەن كەزدەسۋىنەن ءمالىم بولدى، دەپ حابارلايدى Almaty-akshamy.kz قازاقپاراتقا سىلتەمە جاساپ.

ۇكىمەتتىڭ رەسمي سايتىنىڭ حابارلاۋىنشا، كەزدەسۋ بارىسىندا ماشينا جاساۋشىلار وداعىنىڭ باسشىسى وسى سالانىڭ جاي-كۇيى، سىرتقى فاكتورلاردىڭ اسەرى جاعدايىندا الدا تۇرعان مىندەتتەر مەن دامۋ پەرسپەكتيۆالارى تۋرالى باياندادى.

2021 جىلدىڭ قورىتىندىسى بويىنشا تەمىر جول ماشيناسىن جاساۋ 300%-عا، اۋىل شارۋاشىلىعى ماشيناسىن جاساۋ 50،4%-عا، تاۋ-كەن مەتاللۋرگياسى ماشيناسىن جاساۋ 29،3%-عا، اۆتوموبيل ءوندىرىسى 24%-عا، ەلەكتروتەحنيكالىق ماشينا جاساۋ 16،7%-عا جانە مۇناي-گاز ماشيناسىن جاساۋ 14،2%-عا ەلەۋلى ءوسىم كورسەتتى.

كەزدەسۋ بارىسىندا ماشينا جاساۋ سالاسىن دامىتۋدىڭ 2024 جىلعا دەيىنگى جول كارتاسىن ىسكە اسىرۋ، سالا كاسىپورىندارىن وتاندىق شيكىزاتپەن قامتاماسىز ەتۋ، جاڭا وندىرىستەردى قۇرۋ جانە جۇمىس ىستەپ تۇرعاندارىن جاڭعىرتۋ ءۇشىن قولجەتىمدى قاراجات ءبولۋ، وتاندىق تاۋار وندىرۋشىلەرمەن وففتەيك-كەلىسىمشارتتار جاساسۋ، سونداي-اق ماشينا جاساۋ سالاسىنداعى ءوندىرىس كولەمىن ارتتىرۋ ماسەلەلەرى تالقىلاندى.

مەيرام پىشەمبايەۆتىڭ ايتۋىنشا، 2021 جىلى يمپورتتىڭ جالپى كولەمى $41 ملرد قۇرادى، ونىڭ ىشىندە $17 ملرد نەمەسە 41%-ى وتاندىق ماشينا جاساۋ ونىمدەرىنە تيەسىلى. وسىعان بايلانىستى يمپورتتى وتاندىق وندىرىسپەن الماستىرۋ ماسەلەسى – اتالعان نارىقتى دامىتىپ، ەكسپورتقا شىعۋ ءۇشىن وتە وزەكتى.

كەزدەسۋ قورىتىندىسى بويىنشا ءاليحان سمايىلوۆ ۇكىمەت سالانى ىنتالاندىرۋ جانە قازاقستاندا ماشينا جاساۋدى دامىتۋ ءۇشىن قولايلى جاعدايلار جاساۋ جۇمىسىن ودان ءارى جالعاستىراتىنىن اتاپ ءوتتى.