وتكەن جىلى مەملەكەتتىك ساتىپ الۋ كەزىندە 41،4 ملرد تەڭگەگە باعا نەگىزسىز كوتەرىلگەن. بۇل تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى ارمان تىلەۋكەنوۆ ايتتى، دەپ حابارلايدى Kazinform.
«2023 جىلى مەملەكەتتىك ساتىپ الۋ مونيتورينگى بارىسىندا 41،4 ملرد تەڭگە سوماسىنا باعانى نەگىزسىز كوتەرۋ فاكتىسىنىڭ الدى الىندى. مەملەكەتتىك قىزمەتشىلەر كوبىنەسە كەڭسە تاۋارلارىن، جانار-جاعارماي ماتەريالدارىن، كومپيۋتەرلىك تەحنيكا مەن ازىق-تۇلىك ونىمدەرىن ساتىپ الۋ كەزىندە بيۋدجەت كولەمىن كوبەيتكەن. ساتىپ الۋعا بولىنگەن نەگىزسىز سومانى اكىم اپپاراتتارى، ءبىلىم بەرۋ جانە دەنساۋلىق ساقتاۋ ۇيىمدارى ەنگىزگەن»، - دەدى ول ۆەدومستۆودا وتكەن بريفينگتە.
مىسالى، ونىڭ دەرەگىنشە، 2023 جىلدىڭ ناۋرىز ايىندا قوستاناي وبلىسىنا قاراستى اۋداندىق ءبىلىم ءبولىمى ءليترى 580 تەڭگە تۇراتىن جازعى ديزەل وتىنىنىڭ 43 مىڭ ءليترىن ساتىپ الۋدى جوسپارلاعان. وسى ۋاقىتتا اتالعان وتىن ءليترىنىڭ قۇنى 250 تەڭگەدەن تومەن بولعان. ياعني، ەكى ەسەگە قىمباتقا ساتىپ الماعان. سىبايلاس جەمقورلىققا قارسى قىزمەتتىڭ ارالاسۋى ناتيجەسىندە 14،8 ميلليون تەڭگە سوماسىندا شىعىنعا جول بەرىلگەن جوق.
«اقتوبە وبلىسىنىڭ سانيتارلىق-ەپيدەميولوگيالىق باقىلاۋ دەپارتامەنتى 15 ميلليون تەڭگەگە 3 مىڭ دانا ءبىر رەتتىك قورعانىش مەديسينالىق كوستيۋم جيىنتىعىن ساتىپ الماق بولعان. وسىنداي كولەمدەگى تاۋاردىڭ نارىقتاعى ورتاشا قۇنى 6 ميلليون تەڭگەنى قۇرايدى. 9 ميلليون تەڭگە كولەمىندە ۇنەمدەلگەن قارجى بيۋدجەتكە قايتارىلدى. بىلتىر ماۋسىم ايىندا اباي وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسى ۇيىم باسشىسىنا 2 ملن تەڭگەگە جيھاز ساتىپ الۋدى جوسپارلاعان. بۇل – نارىقتىق باعادان ءبىر جارىم ەسە قىمبات. ساتىپ الۋ پروسەسىنە ارالاسقاننان كەيىن جيھازدىڭ باعاسى 700 مىڭ تەڭگەگە تومەندەتىلىپ، 1،3 ميلليون تەڭگەگە ساتىپ الىندى»، - دەدى ارمان تىلەۋكەنوۆ.