وتباسىلىق زورلىق-زومبىلىققا كوز جۇما قاراۋعا بولمايدى - ق ر پرەزيدەنتى قاسىم-جومارت توقايەۆ.
بۇل ماسەلە ق ر پرەزيدەنتى قاسىم-جومارت توقايەۆتىڭ بۇگىنگى جولداۋىندا ايتىلدى، دەپ حابارلايدى Almaty-akshamy.kz.
«وتباسىلىق زورلىق-زومبىلىقتى قىلمىس ساناتىنا جاتقىزۋ ماسەلەسى قوعامدا كوپتەن بەرى تالقىلانىپ ءجۇر. قۇقىق قورعاۋ ورگاندارى بۇل ۇسىنىستىڭ دۇرىس ەكەنىنە كۇمانمەن قارايدى. سەبەبى، مۇنداي تۇرمىستىق جاعدايلاردى انىقتاۋ وڭاي ەمەس، ياعني وسىنداي وقيعالاردى تەرگەپ-تەكسەرۋ قيىنعا سوعادى. بۇل ءسوزدىڭ دە جانى بار. ءبىراق قالاي دەسەك تە، وتباسىلىق زورلىق-زومبىلىققا كوز جۇما قاراۋعا بولمايدى. وتباسىندا ويران سالاتىندار جازاعا تارتىلماسا، ولار ودان بەتەر باسىنىپ كەتەدى. ال جاپا شەككەندەر مۇلدەم قورعاۋسىز قالادى.
مۇنداي ارەكەتتەر ءۇشىن جازانى كۇشەيتەتىن كەز كەلدى دەپ سانايمىن. زارداپ شەككەن جاندار ەلدىڭ سوزىنەن نەمەسە بىرەۋدىڭ قىسىم جاساۋىنان قورىقپاۋى قاجەت»، - دەدى مەملەكەت باسشىسى.