ەلىمىزدە بيىل وتباسىلىق-تۇرمىسقا قاتىستى 668 قىلمىس تىركەلگەن.
بۇل تۋرالى مالىمدەگەن ىشكى ىستەر ءمينيسترى مارات احمەتجانوۆتىڭ ايتۋىنشا، بۇل جاعدايعا ەر ادامدار سەبەپ بولادى، دەپ حابارلايدى Almaty-akshamy.kz
ءىىم مالىمەتىنشە، 80 پايىز جاعدايدا ەر ادام وتباسىلىق جانجالعا سەبەپكەر سانالادى. ادەتتە، ولاردىڭ جاسى 30-دان 50 جاسقا دەيىنگى (52 پايىز) ارالىقتا.
«ونىڭ 74 پايىزىندا تۇراقتى جۇمىس ورنى، ال 90 پايىزىندا كاسىبي جانە جوعارى ءبىلىمى جوق. 78 پايىز جاعدايدا جابىرلەنۋشىلەر - ايەلدەر. كوبىنە ولار زورلىقشىعا ماتەريالدىق جانە پسيحولوگيالىق جاعىنان تاۋەلدى بولادى. ۇزاق جىل بويى قورلاۋ مەن قورقىتۋعا شىداپ جۇرەدى. بالالار دا زارداپ شەگەدى. ولار - قاتىگەز كورىنىستەردىڭ كۋاسى»، - دەدى ءىىم وكىلى.
ۆەدومستۆو مالىمەتىنشە، ددسۇ دەرەكتەرى بويىنشا، تۇرمىستىق زورلىق-زومبىلىق جاسوسپىرىمدەردىڭ پسيحيكاسىنا، رۋحاني جانە ەموسيونالدىق دامۋىنا كەرى اسەر ەتەدى. ولار كەيىن ەسەيە كەلە، وتباسىنان كورگەنىن قۇرداستارىنا جانە باسقالارعا كورسەتەدى.