قازاقستان مۇسىلماندارى ءدىني باسقارماسىنىڭ ۇيىمداستىرۋىمەن ءوتىپ جاتقان «قازاق داستۇرىندەگى وتباسى قۇندىلىعى» رەسپۋبليكالىق تانىمدىق كونفەرەنسياسىندا بايانداما جاساعان باس ءمۇفتي ناۋرىزباي قاجى تاعان ۇلى وسى ماسەلەگە توقتالدى.
«وتباسى تەك ءبىر ادامنىڭ ەمەس، ەكى جاقتىڭ دا ورتاق جاۋاپكەرشىلىگى. ەر مەن ايەل ءوز وتباسىنا قامقور، قيىندىقتا بىرگە بولۋعا مىندەتتى. پايعامبارمىز (وعان اللانىڭ سالاۋاتى مەن سالەمى بولسىن): «شىن مانىندە، ايەلدەرىڭنىڭ سەندەردىڭ الدىندا جانە سەندەردىڭ ايەلدەرىڭنىڭ الدىندا ءتيىستى مىندەتتتەرىڭ بار»، – دەپ ەسكەرتتى. شىن مانىندە، شاريعاتقا نەگىزدەلگەن وتباسى – بەرەكەنىڭ، مەيىرىمنىڭ جانە يماندىلىقتىڭ ورداسى. وسى سەبەپتى ءاربىر مۇسىلمان وتباسى قۇرۋ مەن ونى ساقتاپ قالۋعا جاۋاپتى.
يسلام دىنىندە دە، قازاق حالقىنىڭ داستۇرىندە دە وتباسى ماسەلەسى ۇلكەن ماڭىزعا يە. يسلام وتباسىن كيەلى شاڭىراق رەتىندە سيپاتتاسا، قازاق ءداستۇرى وتباسىن ۇلتتىق رۋحتىڭ، مادەنيەتتىڭ جانە ادەت-عۇرىپتىڭ التىن بەسىگى دەپ باعالايدى. قىز بالا – ادەپ پەن يبانىڭ يەسى رەتىندە، ۇل بالا – ەل مەن جەردىڭ قامقورى رەتىندە ەرلىككە، باتىرلىققا تاربيەلەنگەن. كەلىن – جاڭا تۇسكەن وتباسىنىڭ بەرەكەسى رەتىندە سانالسا، كۇيەۋ بالا – بوتەن ەمەس، تورگە شىققان قۇرمەتتى ادام رەتىندە قاراستىرىلعان» دەدى قمدب ءتوراعاسى ءوز بايانداماسىندا.
رەسپۋبليكالىق تانىمدىق كونفەرەنسياعا زيالى قاۋىم وكىلدەرى، بەلگىلى عالىمدار، وتباسىلىق ساراپشىلار، ءدىن قىزمەتكەرلەرى، ستۋدەنت جاستار مەن ب ا ق وكىلدەرى قاتىسۋدا.