قىتايدىڭ بەيجىڭ قالاسىندا ءوتىپ جاتقان COTTM (China outbound Travel&Tourism) حالىقارالىق كورمەسىنە وتاندىق دەلەگاسيا قاتىسىپ، شەتەلدىكتەرگە ەلىمىزدىڭ تۋريستىك الەۋەتىن كەڭىنەن تانىستىردى.
جالپى كولەمى 96 ش.م. قۇرايتىن قازاقستاندىق ستەندتى تۋريزم جانە سپورت مينيسترلىگىنىڭ تاپسىرىسى بويىنشا «Kazakh Tourism ۇك»، الماتى قالاسى مەن الماتى وبلىسىنىڭ تۋريزم باسقارمالارى ۇيىمداستىردى، دەپ حابارلايدى اlmaty-akshamy.kz.
««Kazakh Tourism» جانە الماتى قالاسى جانە الماتى وبلىسىنىڭ بىرىككەن ستەندى قىتايلىق تۋركومپانيالاردىڭ ەرەكشە ىقىلاسىنا يە بولدى. ءوزارا ۆيزاسىز رەجيمنىڭ ەنگىزىلۋىنە جانە 2024 جىلى قىتايداعى قازاقستان ءتۋريزمى جىلىنا وراي ءبىز ەكى ەلدىڭ تۋريستىك نارىعى تاراپىنان بەلسەندىلىك ارتقانىن بايقاپ وتىرمىز»، - دەدى تۋريزم جانە سپورت ۆيسە-مينيسترى ەرجان ەركىنبايەۆ.
قازاقستاننىڭ ۇلتتىق ستەندى باي مادەني باعدارلاماسىنىڭ ناتيجەسىندە كورمەگە كەلۋشىلەر اراسىندا كەڭىنەن تانىلدى. قازاق باتىرلارىنىڭ بەينەسى، سونداي-اق دومبىرا مەن قوبىزدا ورىندالعان ۇلتتىق كۇيلەر تۋريستەردىڭ كوڭىلىن وزىنە اۋداردى. سونداي-اق ستەندكە كەلۋشىلەر ۇلتتىق تاعامدارىمىزدان ءدام تاتتى.
ستاتيستيكالىق مالىمەتتەرگە سايكەس، الەمدىك پاندەميادان كەيىن ەلىمىزگە ساياحاتتايتىن جۇڭگو تۋريستەرىنىڭ اعىنى قالپىنا كەلە باستادى. ماسەلەن، وتكەن جىلى قازاقستاننىڭ قوناق ۇيلەرىنە 45 مىڭعا جۋىق قىتايلىق تۋريست توقتاعان بولسا، بيىل ولاردىڭ سانى سانى ەكى ەسەگە ءوسىپ، eQonaq اقپاراتتىق جۇيەسىنىڭ دەرەكتەرىنە سايكەس 10 ايدىڭ قورىتىندىسى بويىنشا ورنالاستىرۋ ورىندارىندا 84 مىڭنان استام تۋريست تىركەلگەن.
دەلەگاسيا قۇرامىنا قازاقستاننىڭ تۋريستىك يندۋسترياسىنىڭ 25 وكىلى، اتاپ ايتقاندا 18 تۋروپەراتور، 5 قوناق ءۇي، 1 ساۋدا ورتالىعى جانە Global blue Tax free ەندى.
قازاقستان مەن جۇڭگو اراسىنداعى ءوزارا ۆيزاسىز رەجيم بيىلعى 10 قاراشادا كۇشىنە ەندى. سونىمەن قاتار 2024 جىل قىتايداعى قازاقستان ءتۋريزمى جىلى بولىپ جاريالاندى. سونىڭ شەڭبەرىندە تۋريزم جانە سپورت مينيسترلىگى قىتايلىق تۋريستەردى قازاقستانعا تارتۋ ءۇشىن ءىس-شارالار كەشەنىن وتكىزۋدى جوسپارلاپ وتىر.
قىتايداعى حالىقارالىق تۋريستىك كورمە – شىعۋ ءتۋريزمى مەن شەتەلدە دەمالۋعا باعىتتالعان. كورمەگە جىل سايىن قحر-دان 5000 تۋريزم ماماندارى قاتىسادى.