جاقىن ارادا قازاقستاندىق تاۋارلار تۇركيانىڭ ەڭ اۋقىمدى ماركەتپلەيسىنە شىعۋى مۇمكىن. بۇل تۋرالى سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين ءوزىنىڭ تەلەگرامداعى ارناسىندا جازدى، دەپ حابارلايدى Almaty-akshamy.kz Inform.kz-كە سىلتەمە جاساپ.
«وسى جىلدىڭ مامىر ايىندا پرەزيدەنتىمىز قاسىم-جومارت كەمەل ۇلى تۇركيا رەسپۋبليكاسىنا مەملەكەتتىك ساپارمەن بارعان ۋاقىتتا، وسى ەلدىڭ ءبىرقاتار كومپانيالارىمەن كەلىسسوزدەر جۇرگىزىپ، وتاندىق IT-كومپانيالاردى تانىستىرعان بولاتىنمىن.سولاردىڭ ءبىرى، باۋىرلاس ەلدىڭ نارىعىندا ونلاين ساۋدا بويىنشا كوشباسشى كومپانيا- Trendyol بولاتىن. Trendyol – تۇركيا اۋماعىندا ينتەرنەت دۇكەن ارقىلى، ياعني وزدەرىنىڭ ەلەكتروندى پلاتفورماسى ارقىلى تاۋار جەتكىزۋمەن جانە ساتۋمەن انالىسادى (كۇنىنە شامامەن 1،5 ميليون تاۋار ساتادى)» دەپ جازدى باعدات مۋسين.
Trendyol-دى تۇركيادا جەرگىلىكتى Amazon نەمەسە Alibaba دەپ اتايدى. كومپانيانىڭ قۇنى شامامەن 16 ميلليارد دوللار قارجىنى قۇرايدى.
ءمينيستردىڭ ايتۋىنشا، الداعى ۋاقىتتا قازاقستاندىق تاۋارلار وسى جۇيە ارقىلى تۇركيانىڭ نارىعىنا شىقپاق.
«ساپار بارىسىندا ءبىز ولاردىڭ تاۋارلارىن قازاقستانعا جەتكىزۋ بويىنشا لوگيستيكالىق ماسەلەلەردى پىسىقتادىق، سونداي-اق قازاقستاندىق تاۋارلاردى ءىرى ماركەتپلەيس ارقىلى تۇركيا نارىعىنا شىعارامىز دەپ كەلىستىك، - دەيدى مينيستر. — ەندى مىنە بۇل باستاما – تۇركيا رەسپۋبليكاسىنىڭ پرەزيدەنتى رەجەپ ەردوعاننىڭ قازاقستانعا ساپارى اياسىندا ءوز ناتيجەسىن كورسەتتى. بۇگىن ايماقتىق ماركەتپلەيستەرگە قىزمەت كورسەتەتىن قازاقستاندىق لوگيستيكالىق كومپانيالاردىڭ ءبىرى -Big Way KZ تۇركيالىق Trendyol كومپانياسىمەن ىنتىماقتاستىق تۋرالى كەلىسىمگە قول قويدى. Big Way KZ وتاندىق نارىقتا لوگيستيكالىق تاۋار اينالىمىن جۇزەگە اسىرۋمەن اينالىسىپ كەلە جاتقان كومپانيا. ولاردىڭ شەتەلدىك نارىققا شىعۋىنا الەۋەتتەرى ايتارلىقتاي زور. بىرلەسكەن كەلىسىمنىڭ ارقاسىندا ەندى قازاقستاندىق تاۋارلار تۇركيا نارىعىنا تىكەلەي، دەلدالسىز ساتىلاتىن بولادى».
ۆەدومستۆو باسشىسى قازاقستاندىقتار Trendyol-مەن تانىس ەكەنىن جانە كوبىنەسە دەلدالدار ارقىلى تاۋارلارعا تاپسىرىس بەرەتىنىن اتاپ ءوتتى.