وتاندىق مۋزىكانت ءتۇرلى روليكتەر پەن گولليۆۋدتىق كينوحيتتەر اۋەنىن جازادى

تيگران پاپازيان Warner Brothers، Sony، The Walt Disney Company، Universal Pictures سىندى تانىمال كومپانيالارمەن سەرىكتەس بولعان.

سولتۇستىك ءوڭىرىنىڭ تۋماسى تيگران پاپازياننىڭ ەسىمى كاسىبي ورتادا جاقسى تانىمال. ول «پوسلەدنيي بوگاتىر: «كورەن زلا»، «سوبيبور»، «كارامورا» سەريالىنا جانە باسقا دا اتى شۋلى فيلمدەردىڭ ترەيلەرىنە اۋەن جازعان، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ. 

سونىمەن قاتار جاس كومپوزيتور ءتۇرلى روليك پەن گولليۆۋدتىق كينوحيتتەر مۋزىكاسىنىڭ اۆتورى ەكەنىن ايتا كەتكەن ءجون. تيگران مۋزىكامەن 11 جاسىنان باستاپ اينالىسا باستاعان. ونىڭ ايتۋىنشا، بۇل سالادا بەلگىلى ءبىر دەڭگەيگە كوتەرىلۋ ءۇشىن ادام ءوزى ەڭبەكتەنىپ، ىزدەنۋى كەرەك. ونىڭ قازىرگى جاستارعا ايتارى دا وسى.

«العاشىندا امەريكالىق فيلمدەرگە مۋزىكانى ليسەنزيالاۋمەن اينالىساتىن شەتەلدىك لەيبلدەرگە حابارلاستىم. ولار ترەيلەر مۋزىكاسىنىڭ كاتالوگتارىن جيناپ، كەيىن ءوز تۇتىنۋشىلارىنا ۇسىنادى. مەن كاتالوگقا ءوز اۋەندەرىمدى قالدىرامىن، ال ولار ترەيلەردە قولدانادى. وسىلاي سول ورتادا تانىمال بولا باستادىم. كەيىن رەسەيلىك فيلمدەرگە ترەيلەر جازاتىندار حابارلاستى»، - دەيدى كويپوزيتور تيگران پاپازيان.

كومپوزيتور ترەيلەرلىك مۋزىكا كەز كەلگەن جانردا دامۋعا، باعا جەتپەس تاجىريبە جيناۋعا مۇمكىندىك بەرەتىنىنە سەنىمدى. قازىرگى تاڭدا ونىڭ 25-تەن استام جازعان اۋەنى 50-دەن استام ءتۇرلى ءفيلمنىڭ ترەيلەرىندە قولدانىلدى.