ءونىم ونكولوگيالىق اۋرۋلاردىڭ دا الدىن الۋدا ءتيىمدى
الەمدى ىندەت جايلاعان كەزەڭدە ورگانيزمدى ۆيرۋستان قالاي قورعاپ، سوزىلمالى اۋرۋلار مازالاماس ءۇشىن يممۋنيتەتتى قالاي كوتەرۋگە بولادى؟ سوڭعى ۋاقىتتا ءاربىر قازاقستاندىقتى وسى سۇراق مازالاپ جۇرگەنى انىق. وتاندىق عالىمدار اعزانى ۆيرۋستان قورعايتىن ءونىم ويلاپ تاپتى، دەپ حابارلايدى Almaty-akshamy.kz Baq.kz اگەنتتىگىنە سىلتەمە جاساپ.
National Laboratory Astana (NLA) Nazarbayev University زەرتحاناسىنىڭ ماماندارى اعزانى ارلەندىرەتىن ءنار دەپ اتالاتىن سينبيوتيكتى جاساپ شىعاردى.
سينبيوتيكالىق سۋسىننىڭ سوزىلمالى اۋرۋعا شالدىققان ادامدارعا ەم-دومدىق ىقپالى كلينيكالىق تۇرعىدا دالەلدەنگەن. سونداي-اق ول قانت ديابەتى، مەتابوليزمدىك سيندروم، ارتەريالىق گيپەرتەنزيا مەن ارتىق سالماعى بار ادامداردىڭ دەنساۋلىعىن جاقسارتادى دەپ وتىر ماماندار.
ءونىم قۇرامىنا بىرەگەي پروبيوتيكالىق اشىتقى، پەكتين، ينۋلين مەن انتيبيوتيكپەن ەمدەلگەن سوڭ جانە جانە سوزىلمالى اۋرۋلاردى ەمدەگەندە ورگانيزمدى قالپىنا كەلتىرەتىن بالىق كوللاگەنى كىرەدى. جىلدام سىڭەتىن ميكروەلەمەنتتەر مەن دارۋمەندەردەن تۇراتىن سۋسىن ىشكى فاكتورلار مەن قورشاعان ورتانىڭ جاعىمسىز اسەرىنەن جاسۋشالاردى قورعايدى.
«وسىمدىك تالشىقتارى مەن جاپونيادا وندىرىلگەن بالىق كوللاگەنىنىڭ ارقاسىندا سۋسىن ومىرلىك قاجەتتى امينقىشقىلدارى مەن مينەرالدىڭ قورلارىن تولتىرا الادى. جالپى، ءونىم ۇزاق ءومىر سۇرۋگە سەبەپ بولادى جانە ونكولوگيالىق اۋرۋلاردىڭ الدىن الۋدا ءتيىمدى. قازاقستاندىق عالىمدار ازىرلەگەن فورمۋلا يممۋنيتەتتى نىعايتىپ، حولەستەرين دەڭگەيىن تومەندەتەتىن سۋسىن الۋعا مۇمكىندىك بەرەدى. سۋسىن ىشەكتىڭ ميكروبتىق بالانسى بۇزىلعاندا پايدالى. ونى كەز كەلگەن جاستاعىلارعا قولدانۋعا بولادى»، - دەيدى ازىرلەۋشى عالىمدار.
وتاندىق سۋسىندى جاساپ شىعارعاندا عالىمدار كەشەندى پروبيوتيكالىق، سونداي-اق انتيوكسيدانتتى قاسيەتتەرگە يە قىمىز، شۇبات، ايران سەكىلدى ۇلتتىق سۋسىنداردىڭ ميكروورگانيزمدەرىنىڭ بىرەگەي شتامدارىن قولدانىپتى. ءونىم انتينگەنتوكسيكالىق قاسيەتىنىڭ ارقاسىندا كولورەكتالدى وبىردىڭ الدىن الۋعا جانە قارت ادامدارداعى مەتابوليزمدىك سيندروم مەن كارديوۆاسكۋليارلىق اۋرۋلاردى ەمدەۋگە باعىتتالعان كورىنەدى.