وتاندىق فارماسيەۆتەر ءبىرقاتار جاقپا ماي مەن پرەپارات قىمباتتاۋى مۇمكىن دەپ دابىل قاعۋدا

بۇل تاپسىرىسپەن دارى-دارمەك دايىندايتىن ءدارىحانالارعا اسەر ەتەدى دەيدى ماماندار.

ءقازىر ەلدە ولاردىڭ سانى 126. بۇل ماسەلەنىڭ تۋىنداۋىنا شەتەلدەن الىناتىن فارماسيەۆتيكالىق سۋبستانسيالاردى تىركەۋ جانە سەرتيفيكاتتاۋدى ەنگىزۋ تۋرالى جاڭا جوبانىڭ ۇسىنىلۋى سەبەپ بولىپ وتىر، دەپ حابارلايدى Almaty-akshamy.kz Qazaqstan.tv-عا سىلتەمە جاساپ. 

ەندىگى جەردە ول قۇقىقتىق-نورماتيۆتىك قۇجات اياسىندا تالاپ ەتىلمەك. ءقازىر فارماسيەۆتيكالىق سۋبستانسيالاردىڭ 99 پايىزى شەتەلدەن كەلەدى. ەۋروپادان، رەسەيدەن، قىتايدان الىناتىن دارى-دارمەك شيكىزاتتارى ونسىز دا حالىقارالىق تالاپقا ساي سەرتيفيكاتتالعان. ەندى ونى ەلىمىزدە قايتا تىركەپ، سەرتيفيكاتتاۋ ۇزاق ۋاقىتتى الادى جانە وتە قىمبات. اسىرەسە، بۇل از كولەمدە شىعارىلاتىن، سيرەك كەزدەسەتىن پەرپاراتتاردى دايىنداۋدا فارماسيەۆتەرگە ءتيىمسىز ەكەن.

«جاڭا جوبا قابىلدانسا، ءبىزدىڭ ءدارىحانالارىمىز جابىلادى. سەبەبى ءبىر پرەپاراتتى جاساۋ ءۇشىن قاجەتتى سۋبستانسيالاردى تۇگەل تىركەتىپ، سەرتيفيكاتتاۋ قاجەت. ونىڭ قۇنى وتە قىمبات جانە ۋاقىت الادى. سالدارىنان تاپسىرىستى از قابىلداپ، شەتەلدەن الىناتىن سۋبستانسيانى دا ازايتامىز. بۇل جاي عانا ەمەس، ءدارىنىڭ بەس ەسە قىمباتتاۋىنا اكەلىپ سوعادى»، - دەيدى فارماسيەۆتيكالىق كومپانيانىڭ ديرەكتورى ولگا سەيس.

«فارماسيەۆتەردىڭ بۇل ايتقان ءۋاجى اسىعىستىق. سەبەبى ءبىز سۋبستانسيالاردى تىركەۋ جانە سەرتيفيكاتتاۋدىڭ جاڭا جوباسىن بيزنەس وكىلدەرىنە جانە مەملەكەتتىك ورگان رەتىندە تالابىمىزعا قاراي ىڭعايلاپ بارىپ قابىلدايمىز»، - دەيدى ق ر دەنساۋلىق ساقتاۋ مينيسترلىگى باسقارما باسشىسى ەريك قۇلشانوۆ.