ۇشۋ اپپاراتى 700 مەتر بيىكتىككە كوتەرىلدى
وتاندىق ۇشقىشسىز باسقارىلاتىن ۇشۋ اپپاراتتارى سىناقتان ءوتتى، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
دروندار جۇك تە تاسىمالداي الادى. ولاردىڭ بار ەرەكشەلىگى – قۇراستىرۋ فورماسىندا. بۇل تىكۇشاق ءتيپتى ۇشقىشسىز باسقارىلاتىن اپپاراتتىڭ العاشقى سىناعى. قۇراستىرۋشىلاردىڭ ماقساتى وتاندىق وندىرىستەن شىققان دروننىڭ مۇمكىندىكتەرىن كورسەتۋ. ايتۋلارىنشا، ونى ءقازىردىڭ وزىندە جۇك تاسىمالى ءۇشىن قولدانۋعا بولادى. تەمىر قۇس 7 كەلىگە دەيىن زات تاسىمالداي الادى. ال بۇگىن ۇشۋ اپپاراتى 700 مەتر بيىكتىككە كوتەرىلىپ، كاسپيي تەڭىزىنىڭ اسەم كورىنىستەرىن تاسپاعا باستى.
«ماسەلەن، تەڭىزدەگى مۇنارادان جاعالاۋعا دەيىنگى قاشىقتىق 15-20 شاقىرىم. تاپسىرىس بەرۋشى فلەش-كارتانى جەتكىزۋ ءۇشىن كەمە نەمەسە تىكۇشاق جالداۋى قاجەت. ارينە ونىڭ شىعىنى كوپ جانە كوبىنە ءقاۋىپسىز دە ەمەس. ال ءبىزدىڭ ۇشقىشسىز باسقارىلاتىن اپپاراتىمىز ول جۇمىستى ەش قيىندىقسىز ورىنداي الادى. كۆادركوپتەر بولسا 15-20 شاقىرىم قاشىقتىققا دالمە-دال ۇشا المايدى»،- دەيدى كومپانيانىڭ باس ديرەكتورى ارداق بەكتاسوۆ.
قۇراستىرۋشىلار كومانداسى دروندى كەز كەلگەن ىسكە توزىمدىلىگى ءۇشىن زور ماقتانىشپەن «ءىلبىس» دەپ اتايدى. ونىڭ نەگىزگى ميسسياسى تاۋلى، ورماندى القاپ سەكىلدى ادام جەتۋى قيىن اۋدانداردا قىزمەت ەتۋ.
ۇشۋ اپپاراتى ءۇش كەزەڭمەن قۇراستىرىلادى. الدىمەن سۋرەتى بەينەلەنىپ، قۇرىلىمى ەگجەي-تەگجەيلى ازىرلەنەدى. اەروديناميكالىق مۇمكىندىكتەرى مەن ۇشۋ ماسساسىن دا ەسكەرۋ قاجەت. 3د پرينتەردە سۇلباسى دايىن بولعان سوڭ ينجەنەر-قۇراستىرۋشىلار ءار بولشەگىن جاساپ شىعارادى.
«ءبىز تەحنولوگيالىق پروسەسس بارىسىندا قاجەتتى بەرىكتىك، جەڭىلدىك جانە وزگە دە ولشەمدەردى بەلگىلەپ الامىز. كەيىن بۇل ماتانى ماتريساعا ورنالاستىرىپ، ارنايى شايىرعا مالىپ، ۆاكۋۋمدايمىز. ونى بوياپ ارلەگەن سوڭ تىكۇشاقتىڭ ءبىر بولىگى دايىن بولادى»،-دەدى باس ينجەنەر-قۇراستىرۋشى ۆيتاليي گروو.
بۇل دروندار مينۋس 30-دان پليۋس 45 گرادۋسقا دەيىنگى تەمپەراتۋرادا ۇشا الادى. كومپانيانىڭ ونىمدەرى نەگىزىنەن جەكەلەگەن سەرىكتەستەرگە باعىتتالادى. ۇشۋ اپپاراتتارىن جوندەۋ مەن تەحنيكالىق قىزمەت كورسەتۋ باعىتىن دا بەلسەندى دامىتۋدا. وسىلايشا ىشكى نارىقتى ساپالى ونىممەن قامتۋدى كوزدەيدى.