جيىننىڭ ماقساتى – جاس ۇرپاقتى وتانسۇيگىشتىككە تاربيەلەۋ.
الماتى قالاسى مەدەۋ اۋدانىنىڭ ۇيىمداستىرۋىمەن ش.ءۋاليحانوۆ اتىنداعى الاڭدا «وتان قورعاۋشىلار كۇنى» اتالىپ ءوتتى، دەپ حابارلايدى اlmaty-akshamy.kz.
7 مامىر مەرەكەسىنە ارنايى ورايلاستىرىلعان شارا اۋدان بەلسەندىلەرىنىڭ قاتىسۋىمەن ۇيىمداستىرىلدى.
ءىس-شاراعا اسكەري قىزمەتشىلەر، اسكەري شەنى بار زەينەت جاسىنداعى ارداگەرلەر، قالا تۇرعىندارى، سپورتشىلار جانە ءارتۇرلى سالا ماماندارى قاتىستى.
جيىننىڭ ماقساتى – جاس ۇرپاقتى وتانسۇيگىشتىككە تاربيەلەۋ جانە پاتريوتيزم باعىتىنداعى جۇمىستاردى جانداندىرۋ. سوندىقتان دا ەل ىرگەسى بەرىك بولۋى ءۇشىن ءتۇرلى پاتريوتتىق شارا كورسەتىلدى، رۋحتى كوتەرىن اندەر ورىندالدى. سونىمەن بىرگە اسكەري ساپتىق ءجۇرىس، كۇرەس سايىستارى كورسەتىلدى.
«ءبىز «وتان قورعاۋشىلار» كۇنىن اسا ءقادىرلى دەپ سانايمىز. 1992 جىلى پرەزيدەنت جارلىعىمەن وسى كۇن ەنگەن بولاتىن. سوندىقتان دەربەستىك العان شاقتا ءوز اسكەرىمىز قۇرىلدى. بۇل ۇلكەن مارتەبە، ابىروي بولدى»، - دەدى مەدەۋ اۋدانى ارداگەرلەر كەڭەسىنىڭ ءتوراعاسى باحتيار كامالوۆ.
سونىمەن قاتار ەل بىرلىگىن ساقتاۋ، ىرگەنى تىنىشتىقتا ۇستاۋ ماڭىزدى. وسىنداي قاعيدالار قاتاڭ ساقتالۋ قاجەتتىگى انىق.
«مەدەۋ اۋدانى ۇيىمداستىرعان اسكەري پارادتىق شارانى كورۋگە جىلدا كەلەمىز. ءوزىم زەينەتتە بولسام دا بۇل كۇندى اسا قادىرلەيمىز. نەمەرەلەرىمدى ەرتىپ كەلۋگە تىرىسامىن. وسىنداي يگى دۇنيەنى كورىپ، پاتريوت بولسىن دەيمىز. ءارقاشان قازاق ەلى امان-ەسەن بولىپ، دامي بەرسىن»، - دەدى قالا تۇرعىنى نۇرعاسىر قايىرعالييەۆ.