وسى كۇزدە قازاقستاندا «تازالىق ويىندارى» وتەدى

وعان ەلىمىزدىڭ 10 قالاسىنان 30-دان استام قاتىسۋشى تىركەلگەن.

بۇگىن ەكو شارانى ۇيىمداستىرۋشىلار ولارعا ارنايى ءدارىس وتكىزدى. ترەنينگ كەزىندە ەكولوگيالىق ويىننىڭ ەرەجەلەرى مەن قوقىستى سۇرىپتاۋدىڭ تالاپتارى ءتۇسىندىرىلدى، دەپ حابارلايدى Almaty-akshamy.kz 24.kz-كە سىلتەمە جاساپ.

ايتا كەتەرلىگى، "تازالىق ويىنىنىڭ" بارىسى مەن قورىتىندىسىن ۇيالى تەلەفونداعى ارنايى قوسىمشا ارقىلى باقىلاۋعا بولادى. ءىس-شاراعا قاتىسۋشىلار وسى قوسىمشانى قولدانۋدى ۇيرەندى. 2014 جىلى باستاۋ العان حالىقارالىق "تازالىق ويىندارى" - كوماندالىق جارىس سانالادى. بۇعان دەيىن ەكو شارا اقتاۋ، الماتى جانە استانادا 4 رەت ۇيىمداستىرىلعان ەدى. سول كەزدە 20 توننادان استام قوقىس جينالعان.

بيىل رەكوردتىق كورسەتكىش ورناۋى مۇمكىن. ويتكەنى، "تازالىق ويىندارى" ەلىمىزدىڭ 10 قالاسىندا ءبىر مەزگىلدە وتكىزىلمەك.

«كوپ ادامدار سەنبىلىك بولسىن، تازالىق بولسىن ولار قالدىقتى سۇرىپتامايدى. جۇمىس ورىندارىندا ونداي پروسەسس جوق. ال بۇل جەردە كەلىپ وسىعان ۇيرەنەدى. جانە بۇل قالدىقتان ءبىر نارسە جاساۋعا بولادى عوي. بۇنىڭ باعاسى بار ەكەن عوي، بۇل وسىنشاما بالل تۇرادى ەكەن عوي. بۇلاي جيناسام، ۇيدە دە وسىنى جاساي الامىن دەگەن وسى  بارەردەن ءوتۋ. ەڭ باستى ماقساتى سول»، - دەيدى ەكوبەلسەندى پاكىزات سايلاۋبەكوۆا.