وسكەمەندە كەنە ەنسەفاليتىنە تاعى ءبىر ادام شالدىقتى

شىعىستا بيىلدىڭ وزىندە 2 مىڭداي ادامدى كەنە شاققان

وسكەمەندە تاعى ءبىر ادام كەنە ەنسەفاليتىنە شالدىقتى. ول زيانكەس شاققان سوڭ دەر كەزىندە مەديسينالىق كومەككە جۇگىنبەگەن. ءقازىر دەنساۋلىعى جاقسى، ەم-دوم الىپ جاتىر، دەپ حابارلايدى Almaty-akshamy.kz.

ماماندار كەنە شاققان جاعدايدا بىردەن دارىگەرگە قارالۋدى ەسكەرتەدى. ويتكەنى جاندىك تىستەگەن سوڭ قانعا ۆيرۋس تۇسسە، ادام مۇگەدەك بولىپ قالۋى ىقتيمال. ال كەنە ەنسەفاليتىنە شالدىققان ادامنىڭ باستاپقىدا باسى اينالىپ، لوقسىپ، قىزۋى كوتەرىلۋى مۇمكىن، دەپ جازادى qazaqstan.tv.

جالپى، شىعىستا بيىلدىڭ وزىندە 2 مىڭداي ادامدى كەنە شاققان. ونىڭ 30 پايىزى 14 جاسقا دەيىنگى بالا. دەگەنمەن مامانداردىڭ ايتۋىنشا وتكەن جىلدارمەن سالىستىرعاندا زيانكەستەن زارداپ شەككەندەر سانى بيىل الدەقايدا از. كەنە ەنسەفاليتىنە شالدىققان ەكى ناۋقاس تا دارىگەرلەردىڭ باقىلاۋىندا.

«ناۋقاستار كەنە شاققاننان كەيىن مەديسينالىق كومەككە جۇگىنبەگەندىكتەن، ولارعا پروفيلاكتيكالىق ماقساتتا كەنەگە قارسى يممۋنوگلوبۋلين سالىنعان جوق. ناۋقاستار قازىرگى ۋاقىتتا ارنايى ەم قابىلداۋدا. ولاردىڭ جاعدايى دارىگەرلەردىڭ باقىلاۋىندا»،-دەيدى وبلىستىق سانيتارلىق- ەپيدەميولوگيالىق باقىلاۋ دەپارتامەنتىنىڭ باس مامانى باعلان تاۋانوۆا.