وسك پرەزيدەنتتىككە ۇسىنىلعان ءۇش كانديداتتى تىركەۋدەن باس تارتتى

قاسىم-جومارت توقايەۆ كانديداتتىڭ كۋالىگىن الدى.

بۇگىن ورتالىق سايلاۋ كوميسسياسى پرەزيدەنتتىككە ۇسىنىلعان ءۇش كانديداتتى تىركەۋدەن باس تارتتى، دەپ حابارلايدى Almaty-akshamy.kz كوميسسيانىڭ رەسمي سايتىنا سىلتەمە جاساپ.

كوميسسيانىڭ قاۋلىسىنا سايكەس، «اسار» بىرلەستىگىنەن حايروللا ءعابجالىلوۆ، «تاجىريبەلىك پسيحولوگيا» رەسپۋبليكالىق قوعامدىق بىرلەستىگىنەن فاتيما بيزاكوۆا جانە قازاقستان قۇرىلىسشىلارى وداعىنان ۇسىنىلعان تالعات ەرعالييەۆتىڭ كانديداتۋراسى كونستيتۋسيالىق تالاپتارعا ساي كەلمەيدى.

كونستيتۋسيا جانە «سايلاۋ تۋرالى» كونستيتۋسيالىق زاڭ بويىنشا پرەزيدەنتتىككە ۇمىتكەر بىرنەشە تالاپقا ساي بولۋى قاجەت. ولار:

تۋمىسىنان قازاقستان ازاماتتىعى بولۋى؛

قازاقستان اۋماعىندا سوڭعى 15 جىل بويى تۇرۋى؛

جوعارى ءبىلىمىنىڭ بولۋى؛

جاسى 40-قا تولعان بولۋى؛

بەلسەندى سايلاۋ قۇقىعىنىڭ بولۋى؛

مەملەكەتتىك قىزمەتتە نەمەسە سايلانبالى لاۋازىمداردا كەمىندە 5 جىل جۇمىس تاجىريبەسىنىڭ بولۋى؛

مەملەكەتتىك ءتىلدى ەركىن مەڭگەرۋى.

ايتا كەتەرى، وسى ۋاقىتقا دەيىن 6 كانديدات تالاپقا ساي دەپ تانىلدى. ولار: مەيرام قاجىكەن («امانات» كاسىپوداقتار بىرلەستىگى)، قاسىم-جومارت توقايەۆ (حالىقتىق كواليسيا)، جيگۋلي دايرابايەۆ («اۋىل» پارتياسى)، نۇرلان اۋەسبايەۆ (جسدپ)، قاراقات ابدەن (كاسىبي الەۋمەتتىك جۇمىسشىلار ۇلتتىق اليانسى) جانە سالتانات تۇرسىنبەكوۆا («قازاق انالارى — داستۇرگە جول» قوعامدىق بىرلەستىگى).