پارتيالىق تىزىمگە 90 ادام ەنگىزىلگەن.
ورتالىق سايلاۋ كوميسسياسى Amanat پارتياسىنىڭ الداعى ءماجىلىس سايلاۋىنا پارتيالىق ءتىزىم بويىنشا ۇسىنعان كانديداتتارىن تىركەدى، دەپ حابارلايدى Almaty-akshamy.kz
ورتالىق سايلاۋ كوميسسياسىنىڭ حاتشىسى مۇحتار ەرماننىڭ ايتۋىنشا، Amanat پارتياسىنىڭ پارتيالىق تىزىمىندەگى 90 ادامنىڭ 29-ى – ايەلدەر، قالعانى - جاستار مەن مۇگەدەكتىگى بار ادامدار. بۇل تىزىمگە ەنگىزىلگەن كانديداتتاردىڭ جالپى سانىنىڭ 32،2%ء-ىن قۇرايدى.
"ورتالىق سايلاۋ كوميسسياسى وكىلەتتى مەملەكەتتىك ورگاندارمەن بىرلەسىپ، ءماجىلىس دەپۋتاتى بولىپ سايلانۋ ءۇشىن پارتيالىق تىزىمگە ەنگىزىلگەن كانديداتتاردىڭ كونستيتۋسيا مەن "سايلاۋ تۋرالى" زاڭنىڭ تالاپتارىنا سايكەستىگىنە تەكسەرىس جۇرگىزدى. پارتيالىق تىزىمگە ەنگىزىلگەن بارلىق ادام كونستيتۋسيا جانە "سايلاۋ تۋرالى" كونستيتۋسيالىق زاڭنىڭ تالاپتارىنا سايكەس كەلەدى"، - دەدى ەرمان.
زاڭناماعا سايكەس، ساياسي پارتيا پارتيالىق تىزىمگە ەنگىزىلگەن ءاربىر ادام ءۇشىن سايلاۋ جارناسىن تولەۋى كەرەك. ول ەڭ تومەنگى جالاقىنىڭ 15 ەسەلەنگەن مولشەرىنە، ياعني 1 050 000 تەڭگەگە تەڭ.
الايدا پارلامەنت ءماجىلىسىنىڭ الدىڭعى سايلاۋىندا داۋىس بەرۋگە قاتىسقان سايلاۋشىلاردىڭ 5 جانە ودان كوپ داۋسىن العان ساياسي پارتيالار سايلاۋ جارناسىن تولەمەيدى.
"2021 جىلعى 10 قاڭتاردا وتكەن ءماجىلىس سايلاۋىندا Amanat (بۇرىنعى "نۇر وتان") پارتياسى سايلاۋشىلاردىڭ 71،9 پايىز داۋسىن جينادى. وسىعان بايلانىستى Amanat پارتياسى سايلاۋ جارناسىن تولەۋدەن بوساتىلادى"، - دەدى وسك حاتشىسى.