«التىن ادام – جىل ادامى» ۇيىمداستىرۋ كوميتەتى استاناداعى ورتتەن بىرنەشە ادامدى قۇتقارىپ، كەيىن ءوزى اۋرۋحانادا كوز جۇمعان اسقار زاكيبۋليندى «التىن ادام» دەپ تانىدى. بۇل تۋرالى باتىردىڭ جارى الەۋمەتتىك جەلىدەگى پاراقشاسىندا جازدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ءبىز ءقازىر ەڭبەك دەمالىسىندا جۇرەتىن ەدىك. الماتىنىڭ ارباتىندا قول ۇستاسىپ، كوفە ءىشىپ، قىدىرىپ ءجۇرۋشى ەدىك. سولاي جوسپارلاعان ەدىك قوي.
سول كۇنى، 16 قاراشادا سەنى كەزەكشىلىككە شىعارىپ سالىپ تۇرىپ، ويىمدا ەشتەڭە جوق ايتا سالعان ەدىم. «الاقاي، 20-سى كۇنى سەنىڭ سوڭعى كەزەكشىلىگىڭ ەكەن، ءارى قاراي دەمالىستامىز» دەپپىن. ال سەن ايتتىڭ: «جانىم، سوڭعى ەمەس، دەمالىس الدىنداعى كەزەكشىلىك» دەدىڭ. ەندى مىنە، 20 قاراشادا سەن ەڭبەك دەمالىسىنا شىقتىڭ. ماڭگىلىك، ۇزاق، بىتپەيتىن، قايتىپ كەلمەيتىن دەمالىستاسىڭ... ال مەن بۇل دۇنيەدەمىن. ءبىزدىڭ جوسپارىمىزداعىداي ەمەس. «التىن ادام» تاعايىنداعان سەنىڭ «جىل قاھارمانى» اتالىمىنداعى ماداقتاماڭدى اكەتۋگە كەلدىم»، - دەيدى انەل زاكيبۋلينا.
ونىڭ ايتۋىنشا، بۇگىن ەكەۋىنىڭ وتاۋ قۇرعاندارىنا 5 جىل تولعان.
«ءومىر شىنىمەن قيىن، قاتىگەز، اياۋشىلىقتى بىلمەيتىن، ءتىپتى كەيدە بولجاپ بولمايتىن دۇنيە. ول ەشكىمدى ايامايدى. مەيلى جاسىڭ 10-دا نەمەسە 40-تا بولسىن. سوعان قاراماستان سەن جارقىن ءارى ابىرويلى ءومىر ءسۇردىڭ. التىن ادامسىڭ سەن، اسقار زابيكۋلين! عاسىر ادام، عاسىر قاھارمانى. ومىردەن وتكەننەن كەيىن»، - دەپ جازدى باتىردىڭ جۇبايى.
ەسكە سالا كەتەيىك، ەلوردادا كوپقاباتتى ۇيدە ءورت بولىپ، 3 ادام، ونىڭ ىشىندە ءبىر بالا اۋرۋحاناعا ءتۇستى. ال، 3 ادامدى قۇتقارعان ءورت ءسوندىرۋشى اسقار زابيكۋليندى 80% كۇيىك شالىپ، جانساقتاۋ بولىمىنە جاتقىزىلدى. وعان دوستارى كومەك جينادى.
مەملەكەت باسشىسى ەرلىك كورسەتكەن جانە بىرنەشە ادامنىڭ ءومىرىن قۇتقارعان ەلوردالىق ءورت سوندىرۋشىلەردى قازاقستان رەسپۋبليكاسىنىڭ مەملەكەتتىك ناگرادالارىمەن ماراپاتتاۋ تۋرالى جارلىققا قول قويدى.