2022 جىلعى 18 مامىردا قازاقستان رەسپۋبليكاسىنىڭ ورتالىق رەفەرەندۋم كوميسسياسى «2022 جىلعى 5 ماۋسىمعا تاعايىندالعان رەسپۋبليكالىق رەفەرەندۋمعا حالىقارالىق ۇيىمدار مەن شەت مەملەكەتتەردىڭ بايقاۋشىلارىن اككرەديتتەۋ تۋرالى» قاۋلى قابىلدادى، دەپ حابارلايدى Almaty-akshamy.kz Referendum2022_kz-كە سىلتەمە جاساپ.
سىرتقى ىستەر مينيسترلىگىنىڭ ۇسىنىسى بويىنشا اككرەديتتەۋگە 3 حالىقارالىق ۇيىمنان جانە 5 شەت مەملەكەتتەن 39 بايقاۋشى ۇسىنىلدى.
ونىڭ ىشىندە: 6 بايقاۋشى تمد–دان بايقاۋشىلار ميسسياسىنىڭ قۇرامىندا؛ 5 بايقاۋشى – تۇركى مەملەكەتتەرى ۇيىمى بايقاۋشىلار ميسسياسىنان؛ 17 بايقاۋشى – تمد پاا-دان، سونداي-اق ازەربايجان، بەلارۋس، بولگاريا، گرۋزيا، مولدوۆا ەلدەرىنەن 11 بايقاۋشى اككرەديتتەلدى. اككرەديتتەۋگە ۇسىنىستاردىڭ كەلىپ تۇسۋىنە قاراي بايقاۋشىلار جونىندەگى دەرەكتەر جاڭارتىلىپ وتىراتىن بولادى.
حالىقارالىق بايقاۋ ينستيتۋتىن ورتالىق رەفەرەندۋم كوميسسياسى 2022 جىلعى 6 مامىردا اشتى. حالىقارالىق ۇيىمدار مەن شەت مەملەكەتتەردىڭ بايقاۋشىلارىن اككرەديتتەۋ 2022 جىلعى 30 مامىر ساعات 18:00-گە دەيىن جالعاسادى.