پاۆلودار مەن قاراعاندى وبلىستارىنىڭ شەكارا اۋماعىنداعى تابيعي ءورتتى ءسوندىرۋ جۇمىستارى جالعاسىپ جاتىر. ەكپىندى جەل، تاۋلى جەرلەر جانە ءورت وشاقتارىنا كىرمە جولداردىڭ بولماۋى ءورتتى ءسوندىرۋ جۇمىستارىن قيىنداتىپ وتىر، دەپ حابارلايدى aqshamnews.kz.
ق ر توتەنشە جاعدايلار مينيسترلىگىنىڭ باسپا ءسوز قىزمەتى حابارلاعانداي، قازىرگى ۋاقىتتا قاراعاندى جانە پاۆلودار وبلىستارى، استانا قالاسى تجد كۇشتەرى مەن جەرگىلىكتى اتقارۋشى ورگاندارىنان، تجم 52859 اسكەري بولىمىنەن، «باياناۋىل» مۇتپ-دان جالپى سانى 609 ادام جانە 110 بىرلىك تەحنيكا، «قازاۆياقۇتقارۋ» اق مەن ق ر قورعانىس مينيسترلىگىنەن 4 اۋە كەمەسى ءورتتى جويۋ جۇمىستارىنا جۇمىلدىرىلعان.
«قاراعاندى وبلىسىنىڭ تەرەكتى اۋىلىندا جانە پاۆلودار وبلىسىنىڭ جەلتاۋ قىستاعىندا ءورت ورنى دالالىق ءورت ءسوندىرۋ شتابتارى ورنالاستىرىلدى. ءورتتى ءسوندىرۋ جۇمىستارى جەرۇستى جانە اۋە كولىكتەرىمەن جۇرگىزىلىپ جاتىر. جالپى 12 جاۋىنگەرلىك ۋچاسكە انىقتالدى. وبلىستىق تجد جانە تجم كوماندالىق ورتالىعىندا جەدەل شتابتار جۇمىس ىستەپ جاتىر. اۋە كەمەلەرى ءورت وشاقتارىنا 15 رەت بارىپ، جالپى كولەمى 22 توننا سۋ توكتى»، - دەپ مالىمدەدى مينيسترلىكتەن.
مينيسترلىك بۇعان قوسا، اقپاراتتىق-پسيحولوگيالىق قولداۋ كورسەتۋ ءۇشىن قاراعاندى وبلىسىنىڭ تجد 8 721 2 51 72 23، پاۆلودار وبلىسىنىڭ تجد 8 718 2 20 11 12 جەدەل جەلى تەلەفوندارى جۇمىس ىستەيتىنىن ەسكە سالدى.