«وردا» دەپ بارىپ وپىق جەدى

استانادا كونسەرت بيلەتتەرىنە قاتىستى الاياقتىق انىقتالدى

استانادا جالعان كونسەرت بيلەتتەرىن ساتۋمەن اينالىسقان الاياقتىق سحەما اشكەرەلەندى، دەپ حابارلايدى Polisia.kz. ەلوردا تۇرعىندارى تانىمال «وردا» توبىنىڭ كونسەرتىنە جالعان بيلەتتەر ساتىپ الىپ، الدانعاندارىن تەك كىرە الماعان ساتتە عانا تۇسىنگەن. بۇل جاعدايدان كەيىن ولار دەرەۋ پوليسياعا جۇگىنگەن، دەپ حابارلايدى aqshamnews.kz

سونىمەن قاتار، باسقا دا ازاماتتار رەسەيلىك تانىمال ءانشىنىڭ كونسەرتىنە كىرۋ ءۇشىن جالعان QR كودتار ساتىپ العان. بيلەتتەردىڭ قۇنى 10-نان 20 مىڭ تەڭگەگە دەيىن بولعان، ال جالپى شىعىن شامامەن 200 مىڭ تەڭگەنى قۇرادى.

جەدەل-ىزدەستىرۋ ءىس-شارالارى بارىسىندا الماتى اۋدانىنىڭ كريمينالدىق پوليسيا ءبولىمى بۇل الاياقتىققا 18 جاستاعى ازاماتتىڭ قاتىسى بار ەكەنىن انىقتادى. ول Instagram جەلىسىندە جالعان اككاۋنت اشىپ، تانىمال ورىنداۋشىلاردىڭ كونسەرتتەرىنە جوق بيلەتتەردى ۇسىنعان. پوليسيا كۇدىكتىنى جابىرلەنۋشىلەردىڭ اقشا اۋدارعان بانكتىك شوتىن تەكسەرۋ ارقىلى تاپتى.

تەرگەۋ بارىسىندا جاس جىگىت كىناسىن تولىق مويىنداپ، تاعى 11 الاياقتىق ارەكەت جاساعانىن مويىندادى.

استانا قالاسىنىڭ پوليسيا دەپارتامەنتى تۇرعىندارعا الەۋمەتتىك جەلىلەردەگى جارنامالىق سىلتەمەلەر ارقىلى بيلەتتەر ساتىپ الماۋعا كەڭەس بەرەدى. كەز كەلگەن شاراعا بيلەت الۋ ءۇشىن تەك رەسمي جانە تەكسەرىلگەن سايتتاردى پايدالانۋدىڭ ماڭىزدىلىعىن ەسكەرتەدى.