بيىلعى رامازان ايى 23 ناۋرىزدا باستالادى.
قاسيەتتى رامازان ايىندا اۋىز بەكىتۋ ادامدى تەك رۋحاني تۇرعىدان بايىتىپ قانا قويماي، دەنساۋلىققا دا زور پايدا اكەلەدى. زاماناۋي مەديسينانىڭ ءوزى ورازانىڭ پايداسىن جوققا شىعارمايدى. 365 كۇن بويى تاماق ىشەتىن ادام جىلىنا 30 كۇن ورازا تۇتقاندا، ونىڭ اعزاسى دەمالادى.
عالىمدار اۋىز بەكىتكەن كەزدە ادامنىڭ ىشكى مۇشەلەرىندەگى مايلار ەرىپ، مەتابوليزيم جاقساراتىنىن ايتىپ وتىر. كۇنىنە 14-15 ساعاتقا جۋىق تاماك ىشۋدەن تىيىلاتىندىقتان دا، ادام اعزاسىندا كەرەك ەمەس جاسۋشالار جويۋ پروسەسى ىسكە قوسىلادى.
فرانسۋز بيولوگى، نوبەل سىيلىعىنىڭ لاۋرەاتى الەكسيس كاررەل ءوزىنىڭ «بەلگىسىز ادام» دەگەن ەڭبەگىندە بىلاي دەيدى: «ادام اۋىز بەكىتكەندە، ەڭ ءبىرىنشى اشتىق، ودان السىزدىك سەزىنەدى. كەيدە وسىنىڭ اسەرىنەن ادام قوبالجۋى دا مۇمكىن. بۇل سىرتقى بولىپ جاتقان جاعدايلار، ءبىراق ىشكى ورگانيزمدە قۇبىلىستار بۇعان قاراعاندا ماڭىزدىراق. وسى ساتتە بۇيرەكتەگى قانت قيمىلدايدى، ونىمەن بىرگە تەرىنىڭ استىندا ساقتالعان مايلار ەريدى. ىشكى اعزالار مەن جۇرەك ءبىر قالىپتى جۇمىس ىستەۋى ءۇشىن ورگانيزم وزىندەگى ساقتالعان قوردان قاجەتتى ەنەرگيا جۇمساي باستايدى. بۇل – بولاشاقتا ادام اعزاسىنىڭ جاقسى جۇمىس ىستەۋىن قامتاماسىز ەتەدى».
سونداي اق، اۋىز بەكىتكەن ادامنىڭ ەستە ساقتاۋ قابىلەتى ارتاتىن بولادى. باستاپقىدا باس اينالۋ، اۋىزدان جاعىمسىز ءيىس شىعۋى مۇمكىن. دەگەنمەن ۋاقىت وتە كەلە، ادام اعزاسى اشتىققا ۇيرەنەدى.
ايتا كەتەتىن جايت، اۋىز اشقان سوڭ، بىردەن مايلى، اۋىر تاعامداردى جەۋگە بولمايدى. اعزانى از تاماقتانۋعا جانە قۇنارلى ءارى جەڭىل اس ىشۋگە داعدىلاندىرعان ابزال.
اۋىز بەكىتۋ ارقىلى دەنەدەگى ماي قۇرامى ازايۋمەن قاتار، حولەستەرين مولشەرى دە باسەڭدەي تۇسەدى. بۇل قان قويۋلانۋىنىڭ الدىن الادى.
ەسكە سالايىق، كۇللى مۇسىلمان قاۋىمى ءۇشىن قاسيەتتى بولىپ سانالاتىن، ەرەكشە مول ساۋاپ پەن مۇمكىندىكتەر بەرەتىن قاسيەتتى رامازان ايى 2023 جىلدىڭ 23 ناۋرىزىنا ءتۇسىپ تۇر. ءقادىر ءتۇنى 17 ساۋىردەن 18 ساۋىرگە قاراعان تۇنگە سايكەس كەلەدى. ال ورازا ايت 21 ساۋىرگە بەلگىلەندى.