Almaty-akshamy.kz سايتىندا بۇگىن جارىق كورگەن ماتەريالدارعا شولۋ – كۇن كەرۋەنى
مۇسىلماننىڭ ىنتىماعى ارتاتىن مەزگىل
قاسىم-جومارت توقايەۆ قازاقستان حالقىن رامازان ايىنىڭ باستالۋىمەن قۇتتىقتادى.
«قىمباتتى وتانداستار!
سىزدەردى رامازان ايىنىڭ باستالۋىمەن قۇتتىقتايمىن! حالقىمىز ءۇشىن قاسيەتتى ورازانىڭ ءمان-ماڭىزى ايرىقشا. بۇل – قوعامدا يماندىلىق، ادالدىق، جاناشىرلىق، مەيىرىمدىلىك سياقتى مىزعىماس قۇندىلىقتارعا بارىنشا ءمان بەرىلەتىن كەزەڭ. بۇكىل مۇسىلمان قاۋىمىنىڭ ىنتىماعى ارتىپ، بىر-بىرىنە باۋىرمالدىعى ايقىن كورىنەتىن مەزگىل. ورازا ايى رۋحاني تازارۋعا، مۇقتاج جاندارعا كومەك قولىن سوزىپ، قايىرىمدىلىق جاساۋعا ۇندەيدى»- دەپ جازىلعان پرەزيدەنتتىڭ قۇتتىقتاۋىندا.
ورازا – رۋحتىڭ ازىعى، ءتاننىڭ شيپاسى
بۇگىن، 11 ناۋرىزدا بۇكىل الەم مۇسىلماندارى ءۇشىن ەڭ قايىرلى دا قاستەرلى اي — رامازان باستالدى. قازاقستان مۇسىلماندارى ءدىني باسقارماسىنىڭ باسشىسى، باس ءمۇفتي ناۋرىزباي قاجى تاعان ۇلى ەلىمىزدەگى بۇكىل مۇسىلمان قاۋىمدى قۇتتىقتادى.
«بارشامىزدى قاسيەتتى رامازان ايىنا امان-ەسەن جەتكىزگەن اللا تاعالاعا سانسىز شۇكىرلەر بولسىن. سىزدەردى بەرەكەلى رامازان ايىنىڭ كەلۋىمەن قۇتتىقتايمىن! رامازاننىڭ ءقادىرىن جاقسى تۇسىنگەن ساحابالار ورازاعا التى اي قالعان ساتتەن باستاپ: „راببىمىز، ءبىزدى رامازان ايىنا امان-ەسەن جەتكىزە گور!“ — دەپ دۇعا ەتكەن. ساۋاپ ەسەلەنىپ جازىلاتىن ايدا جاسالعان قايىرلى ءىستىڭ قايتارىمى ادام بالاسى ءۇشىن قۇپيا-سىر. ءتىپتى اۋىز بەكىتكەن ادامعا بەرىلەتىن سىي مەن ساۋاپ، قۇرمەت پەن ماراپات پايعامبارلار مەن پەرىشتەلەرگە دە بەيمالىم. قۇدسي حاديستە اللا تاعالا „ورازا — تەك مەن ءۇشىن. ونىڭ سىيىن (ساۋابىن) ءوزىم عانا بەرەمىن“ دەپ ورازانىڭ ءقادىرى مەن قاسيەتىن، ءمانى مەن ماڭىزىن بايانداعان. دەمەك شاراپاتى مەن شاپاعاتى مول ايدا ساۋاپ جيناۋعا، ىشكى دۇنيەمىزدى تازارتۋعا، جاراتۋشىنىڭ رازىلىعىن الۋعا اسىققان ابزال. پەندەنىڭ وسى ايدا ۇستاعان ورازاسى، اللاعا ۇنامدى بارلىق قۇلشىلىقتارى، وزگەلەرگە جاساعان قايىرىمدىلىعى، ساۋاپتى امالدارى ەسەلەنىپ جازىلادى»،-دەدى باس ءمۇفتي.
توقايەۆ ءازىربايجانعا باردى
مەملەكەتتىك ساپارمەن بارعان قاسىم-جومارت توقايەۆتى گەيدار الييەۆ اتىنداعى حالىقارالىق اۋەجايدا ءازىربايجان پرەمەر-مينيسترىنىڭ ءبىرىنشى ورىنباسارى ياگۋب ەيۋبوۆ پەن سىرتقى ىستەر ءمينيسترىنىڭ ورىنباسارى سامير شاريفوۆ قارسى الدى.
ەكى ەلدىڭ مەملەكەتتىك ءانۇرانى شىرقالعاننان كەيىن قاسىم-جومارت توقايەۆ پەن يلحام الييەۆ بىر-بىرىنە رەسمي دەلەگاسيا مۇشەلەرىن تانىستىردى.
قۇرساق جالداۋدىڭ قۇنى قانشا؟
سۋرروگات انالار ءوز قىزمەتىن 2،5 ملن-نان 9 ملن تەڭگەگە دەيىن باعالايدى. نەگىزگى شىعىندار پاكەتىنە ايەلدىڭ اقىسىنان بولەك، ونى اي سايىن كۇتۋ دە كىرەدى (200 مىڭنان 250 مىڭ تەڭگەگە دەيىن). مىندەتتى شىعىنداردىڭ تاعى ءبىرى – گەنەتيكالىق اتا-انالارعا ارنالعان ەكۇ باعدارلاماسىن تىكەلەي جۇرگىزۋ. ەرلى-زايىپتىلارعا بۇل ءۇشىن 1،5-2 ميلليون تەڭگە جۇمساۋعا تۋرا كەلەدى. بۇل سوما وپەراتيۆ جىنىس جاسۋشالارىن الۋ ءۇشىن نەمەسە ەمبريونداردى قوسىمشا گەنەتيكالىق زەرتتەۋ كەزىندە جەدەل مەديسينالىق پروسەدۋرالاردى جۇرگىزۋ قاجەت بولعان جاعدايدا كوبىرەك بولۋى مۇمكىن. سونداي-اق مىندەتتى شىعىنعا گەنەتيكالىق اتا-انالار مەن سۋرروگات انا اراسىندا شارت جاساسۋدىڭ نوتارياتتىق قىزمەتتەرى كىرەدى: شامامەن 60 مىڭ تەڭگە. وسىلايشا، سۋرروگات انا باعدارلاماسىنىڭ ماڭىزدى كەزەڭدەرىن وتكىزۋ شىعىنى 6،7 ملن-نان 11،3 ملن تەڭگەگە دەيىن بارادى.
26 مىڭ الماتىلىق كولىك سالىعىن تولەمەگەن
بورىشكەرلەردىڭ بەرەشەگى 3،5 ملرد تەڭگەگە جەتكەن. 2023 جىلعى كولىك سالىعىن تولەۋ مەرزىمى بيىل 1 ساۋىردە اياقتالادى. زاڭناماعا سايكەس، سوت ورىنداۋشىلارى كولىك سالىعىن تولەمەگەن ازاماتتاردىڭ بانكتەگى شوتتارى مەن مۇلكىن بۇعاتتاۋعا قۇقىلى.
سالىق سوماسى تۋرالى اقپارات kgd.gov.kz پورتالىندا "جەكە تۇلعالار ءۇشىن الداعى تولەمدەر" سەرۆيسىندە، سونداي-اق "e–Salyq Azamat" جانە كاسپي بانك پەن حالىق بانكتىڭ ءموبيلدى قوسىمشالارىندا جاريالانادى. ءموبيلدى قوسىمشالاردىڭ بارلىق پايدالانۋشىسى كولىك سالىعىنىڭ 2023 جىلعا ەسەپتەلگەن سومالارىن كورەدى جانە ونىڭ تولەمىن جاساي الادى.
قازاقستاندىق ستۋدەنتتەر كوروناۆيرۋسقا قارسى ءدارى جاساپ جاتىر
رەسەيدىڭ ەكاتەرينبۋرگ قالاسىندا وقىپ جاتقان قازاقستاندىق ستۋدەنتتەر كوروناۆيرۋسقا قارسى ءدارى جاساۋعا ۇلەس قوسىپ جاتىر. ورال فەدەرالدى ۋنيۆەرسيتەتىنىڭ ارنايى ورتالىعىندا مولەكۋلالار ستاندارتتالىپ، كەيىن دارىلىك زات شىعارىلادى. ۆيرۋسقا قارسى پرەپاراتتان بولەك، ديابەتكە قارسى تۇرا الاتىن ءدارى جاسالىپ، ءقازىر كلينيكالىق زەرتتەۋدەن وتكىزىلىپ جاتىر.
جۋسان ءيىسى اڭقىعان
اقمولا وبلىسى اقكول اۋدانىنداعى كەڭەس اۋىلىنىڭ 5-سىنىپ وقۋشىسى البينا ايدارحانوۆا ۇستازىمەن بىرگە قازاق دالاسىنىڭ حوش ءيىسى ساقتالعان ءاتىر شىعاردى.
مەكتەپ وقۋشىسىنىڭ ايتۋىنشا، ونى ەرەكشە حوش ءيىس جاساۋعا سۇلتان بەيبارىس تۋرالى اڭىزداعى «جۋساندا تۋعان جەردىڭ ءيىسى بار» دەگەن قاناتتى ءسوز شابىتتاندىرعان.
بۇل حوش ءيىس «ەلىم-اي» دەپ اتالادى. جاس ونەرتاپقىشتىڭ ايتۋىنشا، ءاتىردىڭ اتاۋى ەلىمىزدىڭ مادەنيەتىنە دەگەن سۇيىسپەنشىلىكپەن بايلانىستى.
«قوس مەكەندىلەر» كوبەيگەن
قاراعاندى وبلىسىندا جىل باسىنان بەرى قوس ازاماتتىققا قاتىستى 400-دەن استام دەرەك تىركەلگەن. وبلىستىق پوليسيا دەپارتامەنتىنىڭ مالىمەتىنشە، 15 ازامات اكىمشىلىك جاۋاپكەرشىلىككە تارتىلدى. قولدانىستا بار زاڭناماعا سايكەس، قازاقستان رەسپۋبليكاسىنىڭ ازاماتتىعى بار ادام، وزگە ەلدىڭ ازاماتتىعىن قابىلداسا، 30 كۇن ىشىندە قازاقستان رەسپۋبليكاسىنىڭ ىشكى ىستەر ورگاندارىنا كەلىپ، قازاقستان رەسپۋبليكاسىنىڭ ءتولقۇجاتىن جانە جەكە باس كۋالىگىن تاپسىرۋى كەرەك. تاپسىرىلماعان جاعدايدا، اكىمشىلىك قۇقىقبۇزۋشىلىق تۋرالى كودەكسىنىڭ 496-بابى 2-تارماعىنا سايكەس ەلدەن شىعارۋ جانە قازاقستان رەسپۋبليكاسى اۋماعىنا كىرۋگە 5 جىلعا دەيىن شەكتەۋ قويۋ، سونىمەن قاتار 738 مىڭ 400 تەڭگە ايىپپۇل قاراستىرىلعان.
تارتىپ الۋدىڭ شەبەرى
بىلتىر 8 مامىردا گۇل ساتاتىن دۇكەننەن گۇل شوعىن تارتىپ اكەتكەن ەكس-پوليسەي تاعى دا شۋ شىعارىپ، ءدامحانادا ءبىر ايەلدىڭ تەلەفونىن تارتىپ الىپ، قايتارعىسى كەلمەگەن. تەلەفونىن ماس ەر ادامنان الا المايتىنىن تۇسىنگەن ايەل جانىنداعىلاردان كومەك سۇراعان. سىرا ءىشىپ وتىرعان ەر ادامنىڭ بىلتىر 8 مامىردا ءفلوريستى يتەرىپ قۇلاتىپ، دۇكەننەن گۇل شوعىن الىپ كەتكەن وتباسىلىق سەبەپتەرگە بايلانىستى ءوز وتىنىشىمەن ىشكى ىستەر ورگاندارىنان بوساتىلعان قاراتاۋ اۋداندىق پب-نىڭ بۇرىنعى قىزمەتكەرى ەكەنى انىقتالدى.
سالتاناتتىڭ سالىعى دا سالماقتى
ۇلتتىق ەكونوميكا مينيسترلىگىندە سالىق كودەكسىنىڭ جوباسىنا رەتتەۋشى ساياساتتىڭ كونسۋلتاتيۆتىك قۇجاتى ازىرلەندى. وندا جەكە تۇلعانىڭ بارلىق وبەكتىلەرىنىڭ جيىنتىق قۇنى 130 مىڭ اەك (2024 جىلى 479 960 000 تەڭگە) شەگىنەن اسىپ كەتكەن جاعدايدا "ءسان - سالتانات" زاتتارىنا سالىق سالۋدى ارتتىرۋ تۋرالى ۇسىنىس جازىلعان.
قازالىنىڭ كامپيتى قىتايعا كەتپەك
قازالىنىڭ تانىمال كامپيتىنە قىتايدان سۇرانىس تۇسكەن. ءتاتتى شىعاراتىن سەح تاۋلىگىنە 400 توننا ءونىم دايىندايدى. قازىرگى تاڭدا سەحتىڭ قاسىنان تاعى ءبىر سەح اشىپ، جۇمىس كولەمىن ۇلعايتۋ جوسپارلانعان.