ورالحان بوكەي ەسكەرتكىشى جاڭارتىلدى

بۇل ءمۇسىن سەمەي قالاسىندا جاسالىپتى.

وسكەمەندە جازۋشى ورالحان بوكەيدىڭ ەسكەرتىكىشى جاڭارتىلدى، دەپ حابارلايدى Almaty-akshamy.kz 24.kz-كە سىلتەمە جاساپ.
وسكەمەندە بەلگىلى جازۋشى، دراماتۋرگ ورالحان بوكەيدىڭ ەسكەرتىكىشى جاڭارتىلدى. قالامگەردىڭ وسىدان 8 جىل بۇرىن اشىلعان ءمۇسىنى ساپاسىز بولۋىنا بايلانىستى ادەبيەت جاناشىرلارى ونى قايتا جاساۋ تۋرالى وي كوتەرىپ كەلگەن ەدى. اقىرى وسى ۇسىنىس ەسكەرىلىپ، ورالحان بوكەيدىڭ ءمۇسىنى قولادان قۇيىلىپ، تۇعىرىنا قايتا قويىلدى. جالپى بيىكتىگى 4،8 مەتر. جەيدەسىن يىعىنا ءىلىپ، بۇگىنگى ۇرپاققا ماڭعازدانا قاراپ تۇرعان زاڭعار جازۋشىنىڭ بۇل ءمۇسىنى سەمەي قالاسىندا جاسالىپتى. «مۇزتاۋ»، «قايداسىڭ، قاسقا قۇلىنىم»، «قامشىگەر» سىندى تالاي تانىمال تۋىندىنى ومىرگە اكەلگەن، ءدۇلدىل تۇلعانىڭ اسقاق ەسكەرتكىشى وسكەلەڭ ۇرپاق ءۇشىن ۇلكەن تاربيە.

- كەۋدە ءمۇسىنى بۇرىن دا بولعان،سول كەزدەگى كەۋدە ءمۇسىن جاساۋشىلاردىڭ قاتەلىگىنەن دەۋگە بولمسا،كەمشىلىگى سول كەۋدە ءمۇسىن وتە ساپاسىز ىستەلىپ ەدى،سونى قايتا جاڭعىرتىپ جاتىر. ءور التايدى، ءتور التايدى جىرلاعان زاڭعار جازۋشى بولاتىن، سوعان ءوز ەلىندە، ءوز جەرىندە مىناداي اسقاق كەۋدە ءمۇسىنى قويىلىپ جاتىر. بۇگىن بۇكىل شىعىس قازاقستان ءۇشىن ۇلكەن مەرەكە، - دەدى جۋرناليست، اقىن الىبەك قاڭتاربايەۆ.