ورالدا اسكەرگە شاقىرىلعان جاس جىگىت اسكەري كوميسسارياتتان قاشپاق بولىپ، ءۇشىنشى قاباتتان قۇلاپ، اۋىر جاراقات الدى، دەپ حابارلايدى aqshamnews.kz
وقيعا 1 جەلتوقسان ءتۇنى بولعان. جىگىتتى اسكەري كوميسسارياتقا ەكى دوسىمەن جەتكىزگەن. ونىڭ تۋىستارىنىڭ ايتۋىنشا، شاقىرىلعان جىگىت بۇرىن اسكەري قىزمەتكە شاقىرتۋ الماعان جانە پسيحولوگيالىق تۇرعىدا اسكەرگە دايىن بولماعان.
جىگىتتەردى ءۇشىنشى قاباتتاعى جاتاق بولمەسىنە ورنالاستىرعان سوڭ، ولاردىڭ ءبىرى ءوز-وزىن "باي ادامنىڭ بالاسىمىن، ايىپپۇلدى تولەپ بەرەمىن" دەپ تانىستىرعان، ءبىراق كەيىن ونىڭ دايارشى بولىپ شىققانى بەلگىلى بولدى. تۇندە ول توسەك جاپقىشتاردى بايلاپ، تومەن تۇسۋگە ارەكەت جاساعان. وعان ارتىنان جىگىتتىڭ دوستارى دا قوسىلىپ، ءبىر ۋاقىتتا جىگىتتىڭ ءوزى قاشپاق بولعان، ءبىراق توسەك جاپقىشتارى ءۇزىلىپ كەتىپ، ول جەرگە قۇلاپ تۇسكەن. قۇلاعان جىگىت اۋىر جاراقات الدى: ومىرتقاسى سىنعان جانە دەنەسى سال بولىپ قالۋ ءقاۋپى بار. ءقازىر وعان وپەراسيا جاساتۋعا تۋرا كەلەدى.
جىگىتتىڭ تۋىستارى اسكەري كوميسساريات قىزمەتكەرلەرىن ءوز مىندەتتەرىن ءتيىستى دەڭگەيدە ورىنداماعان دەپ ايىپتاپ وتىر. ولار جاتاق بولمەسىندە جىگىتتەردىڭ قاشۋعا ۇگىتتەلگەنىن جانە بۇل ارەكەتتىڭ سالدارى اۋىر بولعانىن اتاپ ءوتتى.
باتىس قازاقستان وبلىسىنىڭ قورعانىس ىستەرى جونىندەگى دەپارتامەنتى جىگىتتىڭ بۇعان دەيىن 1414 بايلانىس ءنومىرى ارقىلى شاقىرتۋ العانىن حابارلادى. 2023 جىلى وقۋىن بىتىرگەن ول اسكەري قىزمەتتەن بوساتىلۋعا نەمەسە كەيىنگە قالدىرىلۋعا قۇقىعى بولماعان. 30 قاراشادا پوليسيا قىزمەتكەرلەرى ونى وبلىستىق جيىن پۋنكتىنە جەتكىزگەن. دەپارتامەنت وكىلدەرىنىڭ ايتۋىنشا، شاقىرىلۋشىلارعا ەشقانداي مورالدىق نەمەسە پسيحولوگيالىق قىسىم كورسەتىلمەگەن.
جابىرلەنۋشىگە قاتىستى قىلمىستىق كودەكسىنىڭ 387-بابى بويىنشا قىلمىستىق ءىس قوزعالۋ مۇمكىن. وعان 3 مىڭ اەك كولەمىندە ايىپپۇل سالۋ نەمەسە 2 جىلعا دەيىن باس بوستاندىعىنان ايىرۋ جازاسى تاعايىندالۋى مۇمكىن.
كەزەكشىلىك اتقارعان قىزمەتكەردىڭ ارەكەتىنە قاتىستى ىشكى تەكسەرىس جۇرگىزىلۋدە.
قازىرگى ۋاقىتتا جىگىتتىڭ جاعدايى مەديسينالىق قىزمەتكەرلەردىڭ باقىلاۋىندا.