ولار 4،5 ملن تەڭگەگە دەيىن سىياقى مەن وتاندىق جوو-دا وقۋعا گرانتتار الادى
ەڭ بەدەلدى حالىقارالىق پاندىك وليمپيادالاردا قازاقستاندىق وقۋشىلار 3 التىن، 13 كۇمىس جانە 7 قولا مەدال جەڭىپ الدى. ياعني ارالىق قورىتىندى بويىنشا ۇلتتىق قۇراما قورجىنىندا 6 ءپان بويىنشا 23 مەدال بار. بۇل تۋرالى Almaty-akshamy.kz وقۋ-اعارتۋ مينيسترلىگىنە سىلتەمە جاساپ حابارلايدى.
ماتەماتيكادان حالىقارالىق وليمپيادادا قازاقستان قۇراماسى 3 كۇمىس جانە 3 قولا مەدال جەڭىپ العان. كوماند 174 ۇپاي جيناپ، ەلىمىزدىڭ وليمپياداعا قاتىسۋ تاريحىنداعى جاڭا رەكوردىن ورناتتى. بۇل سوڭعى 12 جىلداعى ۇزدىك ناتيجە بولدى.
فيزيكادان حالىقارالىق وليمپيادادا وقۋشىلار 1 التىن، 4 كۇمىس مەدالعا يە بولدى. بۇل سوڭعى 8 جىلداعى ەڭ جاقسى كورسەتكىش. ال گەوگرافيادان وتكەن حالىقارالىق وليمپيادادا ەكىنشى جىل قاتارىنان التىن مەدال جەڭىپ الدى. بيىل دا 1 قولا مەدالعا يە بولدى.
بيولوگيادان حالىقارالىق وليمپياداعا قاتىسۋشىلار 3 كۇمىس جانە 1 قولا جەڭىپ الىپ، بىلتىرعى ناتيجەلەرىن جاقسارتتى.زياتكەرلىك سايىسقا قاتىسقان جاس حيميكتەر 1 التىن جانە 3 كۇمىس جەڭىپ الدى.
سونىمەن قاتار قازاقستاندىق وقۋشىلار لينگۆيستيكادان حالىقارالىق وليمپيادادا العاش رەت 2 قولا مەدال جەڭىپ الدى.
«الداعى ۋاقىتتا ينفورماتيكادان حالىقارالىق وليمپيادا وتەدى. مەن وقۋشىلارىمىزدىڭ حالىقارالىق وليمپيادادا ەل نامىسىن ابىرويمەن قورعايتىنىنا سەنىمىم مول. وليمپياداعا قاتىسۋشىلار مەن جۇلدەگەرلەرگە قاجىرلى ەڭبەكتەرى، كۇش-جىگەرلەرى مەن تاباندىلىقتارى ءۇشىن العىس ايتامىن. كۇندەلىكتى جۇمىسى جانە جوعارى كاسىبيلىگى ءۇشىن ارىپتەستەرىمە دە راحمەت ايتقىم كەلەدى. بيىل پرەزيدەنتتىڭ قولداۋىنىڭ ارقاسىندا العاش رەت وقۋشىلارىمىز 4،5 ملن تەڭگەگە دەيىن اقشالاي سىياقىعا جانە ۇبت-دان وتپەي-اق قازاقستاندىق جوعارى وقۋ ورىندارىندا وقۋ ءۇشىن گرانتقا يە بولادى. التىن مەدال العان وقۋشىعا 1 500 اەك، كۇمىس مەدالعا 1 000 اەك، قولا مەدالعا 500 اەك كولەمىندە اقشالاي سىيلىق بەرىلەدى. وقۋشىلاردى جارىسقا دايىنداعان ۇستازدار دا ءبىرجولعى سىياقى الادى»، - دەدى وقۋ-اعارتۋ ءمينيسترى اسحات ايماعامبەتوۆ.