وقۋشىلاردىڭ ساباقتا تەلەفون ۇستاۋى وقۋ-اعارتۋ ءمينيسترىنىڭ بۇيرىعىمەن شەكتەلمەك. قازىرگى تاڭدا بۇل ماسەلەنى زاڭدىق تۇرعىدا رەتتەيتىن ەشقانداي قۇجات جوق.
وقۋ-اعارتۋ ءمينيسترى وقۋشىلاردىڭ ساباقتا تەلەفون ۇستاۋىن شەكتەيتىن بۇيرىق شىعارماق. بۇيرىق جوباسى اشىق نقا پورتالىندا جاريالاندى. بۇيرىق جوباسىندا ورتا ءبىلىم بەرۋ ۇيىمدارى قىزمەتىنiڭ ۇلگىلىك قاعيدالارىن بالالاردىڭ ءومىرى مەن دەنساۋلىعى ءۇشىن پەداگوگتەر مەن اتا-انالاردىڭ جاۋاپكەرشىلىگىن جۇكتەۋ تۋرالى تارماقتارمەن تولىقتىرۋ كوزدەلگەن.
«ءمۇعالىمنىڭ شەشىمى بويىنشا ساباقتا ولاردى قولدانۋ قاجەتتىلىگىن ەسەپكە الماعاندا، ءبىلىم الۋشىلار مەن پەداگوگتار ساباقتاردا ءموبيلدى بايلانىس قۇرالدارىن پايدالانبايدى»، – دەپ جازىلعان جوبادا.
سونىمەن قاتار، قۇجاتتا ءبىلىم بەرۋ ۇيىمىنان تىس بولعان كەزدە وقۋشىنىڭ ءومىرى مەن قاۋىپسىزدىگى ءۇشىن اتا-انالارى نەمەسە وزگە دە زاڭدى وكىلدەرى جاۋاپتى بولاتىنى جازىلعان. ياعني، ساباققا دەيىن، ساباقتان كەيىن، دەمالىس ۋاقىتىندا بالالارعا قاتىستى جاۋاپكەرشىلىك اتا-انالارعا نەمەسە زاڭدى وكىلدەرگە جۇكتەلەدى. بۇل بالانىڭ ءومىرى مەن قاۋىپسىزدىگى ءۇشىن مەكتەپتىڭ جاۋاپكەرشىلىگىنىڭ شەكاراسىن انىقتاۋ ماقساتىندا ەنگىزىلگەلى وتىر. سونداي-اق، قۇجات جوباسىنا سايكەس، تەرىس قىلىقتار جاساعان، مەكتەپتىڭ ىشكى ءتارتىپ قاعيدالارى تالاپتارىن بۇزعان وقۋشىنى ساباقتاردان شەتتەتۋگە، سونداي-اق اتا-اناسىنىڭ نەمەسە وزگە دە زاڭدى وكىلدەرىنىڭ قاسىندا ەرىپ ءجۇرۋىنسىز ءبىلىم بەرۋ ۇيىمىنان شىعارۋعا جول بەرىلمەيدى. ءبىلىم بەرۋ ۇيىمى قاجەت بولعان جاعدايدا اتا-انالاردى نەمەسە وزگە دە زاڭدى وكىلدەردى مەكتەپكە شاقىرىپ، بولعان جاعداي تۋرالى حاباردار ەتەدى جانە ءتيىستى شارالار قابىلدايدى.