جاستاردىڭ جۇرگىزگەن ساۋالناماسى بويىنشا كوپتەگەن بالالار Lego كونسترۋكتورىمەن ويناعاندى ۇناتادى
تۇركىستان وبلىسى، كەلەس اۋدانىنداعى №2 ءو.جانىبەكوۆ اتىنداعى مەكتەپ گيمنازيانىڭ 9-سىنىپ وقۋشىلارى شالدىبايەۆا ۇلمەكەن مەن امانباي نۇرسيلا قوقىس جينايتىن روبوت قۇراستىردى، دەپ حابارلايدى Almaty-akshamy.kz.
جاس زەرتتەۋشىلەردىڭ «قوقىس جينايتىن روبوت» تاقىرىبىنداعى زەرتتەۋ جۇمىسىن جازۋ بارىسىندا وقۋشىلار بۇل سالانىڭ وزەكتى ماسەلەلەرىن تەرەڭ زەرتتەگەن.
ولاردىڭ وسى تاقىرىپتاعى عىلىمي ىزدەنىسى «وقۋشىلاردىڭ اۋداندىق جالپى ءبىلىم بەرەتىن پاندەر بويىنشا عىلىمي جوبالار» كونكۋرسىندا جوعارى باعالاندى. قىزداردىڭ عىلىمي جەتەكشىسى اياگوز جورايەۆنانىڭ ايتۋى بويىنشا، عىلىمي جوبانىڭ ماقساتى - روبوت تەحنيكاسىنىڭ نەگىزدەرىن، قولدانۋ سالالارىن، ولاردىڭ تۇرلەرىن، مۇمكىندىكتەرىن زەرتتەۋ.
«بۇگىندە روبوتتار - قارقىندى دامىپ كەلە جاتقان بولاشاقتىڭ جوعارعى تەحنولوگيالارىنىڭ ءبىرى. ولار ءومىرىمىزدىڭ كوپتەگەن سالاسىنا، اتاپ ايتقاندا، عارىشتى يگەرۋ، دەنساۋلىق ساقتاۋ، قوعامدىق قاۋىپسىزدىكتى قامتاماسىز ەتۋ جانە باسقا دا سالالارعا ەنىپ ۇلگەردى، اسىرەسە ءوندىرىس ورىندارىندا كوبىرەك پايدالانىلادى. وقۋشىلار جەكە تاجىريبە ارقىلى روبوتتىڭ جۇمىس جاساۋ پرينسيپتەرىن باقىلادى. جاس زەرتتەۋشىلەر بۇل جوبامەن بىرنەشە جىلدان بەرى اينالىسىپ كەلەدى»،- دەيدى ينفورماتيكا ءپانىنىڭ ءمۇعالىمى.
جاستاردىڭ جۇرگىزگەن ساۋالناماسى بويىنشا كوپتەگەن بالالار Lego كونسترۋكتورىمەن ويناعاندى ۇناتادى. جاس زەرتتەۋشىلەر بولاشاقتا كومپيۋتەرلىك IT تەحنولوگيالاردى مەڭگەرۋ، پروگرامميست ماماندىعىن مەڭگەرگىسى كەلەدى.