2011 جىلى تۋعان قىز قىرعىزستاننىڭ پانفيلوۆ اۋدانىندا زاڭسىز بولعان
وقۋ-اعارتۋ مينيسترلىگىنىڭ بالالاردىڭ قۇقىقتارىن قورعاۋ كوميتەتى بەس بالانى ەلگە قايتاردى، دەپ حابارلايدى Almaty-akshamy.kz.
وقۋ-اعارتۋ مينيسترلىگىنىڭ باسپا ءسوز قىزمەتىنىڭ مالىمدەۋىنشە، ەلىمىزدىڭ كامەلەتكە تولماعان ازاماتتارى قىرعىزستاندا زاڭسىز جۇرگەن. 2022 جىلدىڭ باسىنان بەرى قىرعىز رەسپۋبليكاسىنان 3 قىز جانە 2 ۇل ەلگە قايتارىلدى.
«بالالاردىڭ قۇقىقتارىن قورعاۋ كوميتەتى بالالاردىڭ مۇددەسى ءۇشىن اۋقىمدى جۇمىس اتقارىپ جاتىر. 2022 جىلدىڭ باسىنان بەرى ق ر وقۋ-اعارتۋ مينيسترلىگىنىڭ بالالاردىڭ قۇقىقتارىن قورعاۋ كوميتەتى قىرعىز رەسپۋبليكاسىنىڭ اۋماعىنان بارلىعى 5 كامەلەتكە تولماعان بالانى، سونىڭ ىشىندە 3 قىز جانە 2 ۇل بالانى ەلگە قايتاردى. 2011 جىلى تۋعان قىز قىرعىزستاننىڭ پانفيلوۆ اۋدانىندا زاڭسىز بولعان. قولدا بار اقپاراتقا سايكەس، بالانىڭ اناسى كورشى مەملەكەتكە بارىپ، قىزىن تاربيەلەۋگە ءتيىستى قۇجاتتاردى رەسىمدەمەي، بەيتانىس ادامدارعا تاپسىرعان. بالا جاقىن تۋىسىنىڭ ءوتىنىشى بويىنشا قازاقستانعا قايتارىلدى. سونداي-اق 2009 جانە 2011 جىلدارى تۋعان اپكەسى مەن ءىنىسى بىشكەكتە بولعان. قازاقستان رەسپۋبليكاسى مەن قىرعىز رەسپۋبليكاسىنىڭ مەملەكەتتىك ورگاندارى ارقىلى بالالاردى ەلگە قايتارۋ قاجەتتىلىگى تۋرالى ءوتىنىش كەلىپ ءتۇستى. تاعى ءبىر جاعداي 2010 جانە 2015 جىلى تۋعان اعاسى مەن قارىنداسى قىرعىز رەسپۋبليكاسىنىڭ وش وبلىسىنىڭ قارا-سۋي اۋدانىندا بولعان. بالالار تۋىستارىندا زاڭسىز بولعان جانە ولار اناسىنىڭ ءوتىنىشى بويىنشا ەلگە قايتارىلدى»، – دەدى ق ر وقۋ-اعارتۋ ۆيسە-مينيسترى عاني بەيسەمبايەۆ.
ءىس-شارا بارىسىندا كامەلەتكە تولماعاننىڭ بارلىعى الماتى قالاسىنداعى بالالاردى قولداۋ ورتالىعىنا جەتكىزىلدى. قازىرگى ۋاقىتتا قولدانىستاعى زاڭناماعا سايكەس بالالاردى تۋىستارىنا بەرۋ جۇمىستارى اياقتالدى/نەمەسە جۇرگىزىلىپ جاتىر.
ق ر وقۋ-اعارتۋ مينيسترلىگىنىڭ بالالاردىڭ قۇقىقتارىن قورعاۋ كوميتەتى تاۋەلسىز مەملەكەتتەر دوستاستىعىنا قاتىسۋشى مەملەكەتتەر اراسىنداعى كامەلەتكە تولماعانداردى تۇراقتى تۇراتىن مەملەكەتتەرىنە قايتارۋ ماسەلەلەرى بويىنشا ىنتىماقتاستىق تۋرالى كەلىسىمگە سايكەس اتا-اناسىنىڭ نەمەسە زاڭدى وكىلدەرىنىڭ ءوتىنىشى بويىنشا بالالاردى قايتارۋعا قولداۋ كورسەتەدى.
قازاقستان رەسپۋبليكاسى ازاماتتارىنان تاعى وتىنىشتەر تۇسكەن جاعدايدا مۇنداي جۇمىستار جالعاسىن تابادى.