وقۋ-اعارتۋ مينيسترلىگى «التىن بەلگى» تۋرالى بۇيرىققا وزگەرىس ەنگىزبەك

دارىندى بالالاردى قولداۋ ماقساتىندا جان-جاقتى جۇمىستار اتقارىلىپ جاتىر.

11-سىنىپ تۇلەكتەرى حالىقارالىق وليمپيادالارعا دايىندالۋ ءۇشىن وقۋ-جاتتىعۋ جيىندارىنا قاتىسقان جاعدايدا قورىتىندى اتتەستاسيادان بوساتىلۋى مۇمكىن، دەپ حابارلايدى Almaty-akshamy.kz

جاڭا وقۋ جىلىنان باستاپ جالپى ءبىلىم بەرەتىن پاندەر بويىنشا ۇزدىك وقۋشىلار جانە سوڭعى ءۇش جىل بويى حالىقارالىق وليمپيادالاردىڭ جەڭىمپازى اتانعان «التىن بەلگى» توسبەلگىسىنە ۇمىتكەرلەر قاجەت بولعان جاعدايدا قورىتىندى ەمتيحانداردان بوساتىلىپ، ۇزدىك بەلگىسىن الادى.

«بۇعان دەيىن «التىن بەلگىگە» ۇمىتكەر حالىقارالىق وليمپيادالاردىڭ جەڭىمپازدارى قورىتىندى اتتەستاسيا كەزىندە جازعى وقۋ-جاتتىعۋ جيىندارىندا بولىپ، حالىقارالىق وليمپيادالار مەن جارىستارعا دايىندالىپ، ەمتيحان تاپسىرا الماسا، اۆتوماتتى تۇردە «التىن بەلگى» بەلگىسىنەن ايىرىلاتىن. ەندى تۇلەكتەر ونى الا الادى. ول ءۇشىن «ۇزدىك» دەگەن باعا بولۋى كەرەك. ءقازىر دارىندى بالالاردى قولداۋ ماقساتىندا جان-جاقتى جۇمىستار اتقارىلىپ جاتىر. بۇل وزگەرىس تە بالالاردىڭ مۇددەسى ءۇشىن قابىلداندى»، - دەدى ق ر وقۋ-اعارتۋ مينيسترلىگى ورتا ءبىلىم كوميتەتىنىڭ ءتوراعاسى گۇلميرا كارىموۆا.

بيىل پرەزيدەنتتىڭ تاپسىرماسىمەن حالىقارالىق پاندىك وليمپيادالاردىڭ 27 جەڭىمپازى العاش رەت 76 ملن تەڭگەدەن استام سىياقى الدى. سونداي-اق وقۋشىلار جەرگىلىكتى جوعارى وقۋ ورىندارىنا وقۋعا گرانت يەلەندى. التىن مەدال العان وقۋشى 1 500 اەك، كۇمىس مەدال 1 000 اەك، قولا مەدال 500 اەك كولەمىندە سىياقى الدى. وقۋشىلاردى وليمپياداعا دايىنداعان تالىمگەر ۇستازدار دا ءبىر رەتتىك سىياقىعا يە بولدى.