وقۋ-اعارتۋ ءمينيسترى عاني بەيسەمبايەۆ ۇلىبريتانياعا جۇمىس ساپارىمەن باردى.
وندا ول ءبىلىم بەرۋ تەحنولوگيالارىنىڭ حالىقارالىق كورمەسىنە قاتىستى، دەپ حابارلايدى Almaty-akshamy.kz مينيسترلىكتىڭ سايتىنا سىلتەمە جاساپ.
ۆەدومستۆو باسشىسى IT-سالا وكىلدەرىمەن جانە Microsoft، Google، Lenovo، Good Tech Advisory ءىرى حالىقارالىق كومپانيالارىنىڭ ءبىلىم بەرۋ سەگمەنتىنىڭ باسشىلارىمەن كەلىسسوزدەر جۇرگىزدى.
كەزدەسۋ بارىسىندا تاراپتار سيفرلىق تەحنولوگيالاردى دامىتۋ پەرسپەكتيۆالارى مەن قازىرگى زامانعى الەمدىك ترەندتەردى، سونداي-اق ءبىلىم بەرۋدەگى جاساندى ينتەللەكتتىڭ مۇمكىندىكتەرى مەن اسەرىن تالقىلادى. عاني بەيسەمبايەۆ كەزدەسۋگە قاتىسۋشىلارعا قازاقستاندا وقىتۋدىڭ يننوۆاسيالىق ادىستەرىن ەنگىزۋ بويىنشا قابىلدانىپ جاتقان شارالار تۋرالى ايتىپ بەردى.
«مەملەكەت سيفرلىق ينفراقۇرىلىمدى نىعايتۋعا جانە سيفرلىق يندۋستريانى، اتاپ ايتقاندا، جاساندى ينتەللەكتتى دامىتۋعا ەرەكشە نازار اۋدارادى. سالالىق ۆەدومستۆو ءبىلىم بەرۋدى سيفرلىق ترانسفورماسيالاۋ باعىتىندا جان-جاقتى جۇمىس جۇرگىزۋدە. وتكەن جىلى ەلىمىزدىڭ ءبىر وڭىرىندە ءبىز «سيفرلىق تەحنولوگيالاردى قولدانا وتىرىپ، شاعىن جيناقتالعان مەكتەپتەردىڭ الەۋەتىن دامىتۋ» جوباسىن ىسكە قوستىق. وقۋلىقتار ەلەكتروندى فورماتقا كوشىرىلدى. بۇكىل جۇيەنى سيفرلاندىرۋ بويىنشا كەزەڭ-كەزەڭىمەن جان-جاقتى جۇمىس جۇرگىزىلۋدە. ءقازىر بىزگە ءبىلىم بەرۋ ساپاسىن ارتتىرۋ ءۇشىن جاساندى ينتەللەكتتى قولدانۋ بويىنشا جەتەكشى ەلدەردىڭ وزىق تاجىريبەسى قىزىقتى»، - دەپ اتاپ ءوتتى ق ر وقۋ-اعارتۋ ءمينيسترى.
Lenovo باس ديرەكتورى كريس بابسون مەن Lenovo ءبىلىم بەرۋ سەگمەنتىنىڭ جاھاندىق باسشىسى ستيۋارت كينگ ءوز كومپانيالارىنىڭ جاساندى ينتەللەكت سالاسىنداعى دامۋىنا توقتالدى. مامانداردىڭ ايتۋىنشا، ول وقىتۋعا قول جەتكىزۋ كەدەرگىلەرىن ازايتۋ جانە باسقارۋ پروسەستەرىن اۆتوماتتاندىرۋ ارقىلى جاھاندىق ءبىلىم بەرۋ ماقساتتارىنا جەتۋ پروسەسىن جەدەلدەتۋ مۇمكىندىگىنە يە.
«جاساندى ينتەللەكت كۇندەلىكتى تاپسىرمالاردى ورىنداۋ ارقىلى مۇعالىمدەردىڭ ۋاقىتىن ۇنەمدەي الادى. بۇل مۇعالىمدەرگە وقىتىلاتىن ساباقتىڭ ساپاسىمەن جۇمىس ىستەۋگە جانە وقۋشىلارمەن ءوزارا ارەكەتتەسۋگە كوبىرەك ۋاقىت بەرەدى. تەحنولوگيالاردى قولدانۋ ءاربىر وقۋشى ءۇشىن ونىڭ جەكە ەرەكشەلىكتەرى مەن قاجەتتىلىكتەرىن ەسكەرە وتىرىپ، ءتيىمدى وقۋ باعدارلامالارىن قۇرۋعا مۇمكىندىك بەرەدى»، — دەدى ءىرى حالىقارالىق كومپانيانىڭ وكىلدەرى.
سونداي-اق، ساپار اياسىندا مينيستر «Bett Show» حالىقارالىق ءبىلىم بەرۋ تەحنولوگيالارى كورمەسىنە قاتىستى. بۇل ءبىلىم بەرۋ سالاسىنداعى ەلەكترونيكا وندىرىسىنە نەگىزدەلگەن الەمنىڭ 700-دەن استام كومپانياسى قاتىساتىن ءىرى سالالىق كورمەلەردىڭ ءبىرى.