الەۋمەتتىك جەلىلەردە، اسىرەسە Threads-تە "جار ىزدەيمىن"، "تانىسقىم كەلەدى" دەگەن جاريالانىمداردى ءجيى كەزدەستىرۋگە بولادى.
بۇل تۋرالى Aqshamnews.kz Astanatv.kz-كە سىلتەمە جاساي وتىرىپ حابارلايدى.
مۇنداي جازبالاردىڭ ارتىندا قاراپايىم جەلى قولدانۋشىلارىنان تىس الاياقتار دا بولۋى مۇمكىن.
الاياقتار كوبىنە وزدەرىن تارتىمدى جىگىت نەمەسە قىز رەتىندە تانىستىرىپ، حات الماسۋدى بەلسەندى تۇردە جۇرگىزىپ، ادامعا ەرەكشە كوڭىل ءبولىپ، قىسقا ۋاقىت ىشىندە سەنىمگە كىرەدى. ۋاقىت وتە كەلە اڭگىمە قارجىلاي كومەك سۇراۋعا ۇلاسۋى مۇمكىن. الاياقتىق سحەما ادەتتە بىلاي ءوربيدى: بەلسەندى قارىم-قاتىناس ورناتۋ جانە ەموسيالىق تاۋەلدىلىك قالىپتاستىرۋ؛ ومىردەگى قيىن جاعدايلار، اۋرۋ، شۇعىل شىعىندار نەمەسە ءتيىمدى ينۆەستيسيالار تۋرالى اڭگىمەلەر؛ اقشا اۋدارۋدى، ونىڭ ىشىندە قاراجاتتى شەتەلدىك كريپتوامياندارعا اۋدارۋدى نەمەسە ءۇشىنشى تۇلعالار ارقىلى جىبەرۋدى سۇراۋ؛ قاراجات الىنعاننان كەيىن بايلانىس ءۇزىلiپ، جابىرلەنۋشىنى بۇعاتتاۋ. ەگەر ەكراننىڭ ارعى جاعىنداعى ادام سىزدەن اقشا اۋدارۋدى سۇراسا، بەينەبايلانىستان جانە جەكە كەزدەسۋدەن قاشسا، ينتەرنەتتەگى فوتوسۋرەتتەردى پايدالانسا، ساق بولعان ءجون.
الاياقتاردىڭ ارباۋىنا ءتۇسىپ قالماس ءۇشىن: ينتەرنەت ارقىلى تانىسقان ادامدارعا اقشا جانە جەكە دەرەكتەردى بەرمەۋ؛ جەكە فوتوسۋرەتتەردى جىبەرمەۋ؛ كۇماندى سىلتەمەلەرگە وتپەۋ؛ سۇحباتتاسۋشىنىڭ ءپروفيلىن جانە ول تۋرالى اقپاراتتى تەكسەرۋ؛ كۇمان تۋىنداعان جاعدايدا جازبانى توقتاتۋ كەرەك. ىشكى ىستەر مينيسترلىگىنىڭ كيبەرقىلمىسقا قارسى ءىس-قيمىل دەپارتامەنتى ازاماتتاردى ونلاين-تانىسۋ كەزىندە ساق بولۋعا جانە قۇقىققا قايشى ارەكەتتەر تۋرالى ۋاقتىلى پوليسياعا حابارلاۋ قاجەت.