ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ويىن بيزنەسى، لوتەرەيالار جانە لوتەرەيا قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ەكىنشى وقىلىمدا قارالىپ، قابىلداندى.
«وزدەرىڭىز بىلەتىندەي، بۇل ەڭ كوپ تالقىلانعان زاڭ جوباسى بولدى. ونىڭ كوتەرىلىپ، زاڭ جوباسى رەتىندە ازىرلەنىپ، ۇزدىكسىز تالقىلانىپ كەلە جاتقانىنىڭ وزىنە 2 جىلدىڭ ءجۇزى تولدى. ۇكىمەتتىڭ قورىتىندىسىن الۋدىڭ وزىنە 1،5 جىلداي ۋاقىت كەتتى. قوعامدىق ديالوگ الاڭدارىندا دا، پارلامەنت قابىرعاسىندا دا كەڭىنەن تالقىلاندى. بۇل وسى ماسەلەنىڭ اسا وزەكتى ەكەندىگىن كورسەتەدى. بۇعان مەملەكەت باسشىسىنىڭ ءوزى بىرنەشە رەت ارنايى توقتالىپ، ونى اۋىزدىقتاۋ جونىندە ناقتى تاپسىرما بەردى»، - دەدى ءماجىلىس دەپۋتاتى ەلنۇر بەيسەنبايەۆ.
ونىڭ ايتۋىنشا، زاڭ اياسىندا قۇمار ويىندارعا جانە ءباس تىگۋگە قاتىسۋعا شەكتەۋ قويىلعان ادامداردىڭ ءتىزىمى انىقتالدى. قۇمار ويىندارعا وزىنە-وزى تىيىم سالۋدىڭ مەرزىمى ءبىر جىلدان 10 جىلعا دەيىن ۇلعايتىلدى. ەندى، وزىنە تىيىم سالىنعان مەرزىمدى ەرتە توقتاتۋ مۇمكىن بولمايدى.
«ەگەر ادام ويناعىسى كەلسە دە، ويناي الماسا، وندا بۇل ونىڭ جاۋاپكەرشىلىگى. ويتكەنى ول ءوزىن-وزى شەكتەۋ قۇجاتىنا قول قويعان كەزدە بارلىق زاڭدى مىندەتتەمەلەردى سانالى تۇردە قابىلداعان ەدى»، - دەدى دەپۋتات.
مەملەكەتتىك قىزمەتشىلەر، اسكەري قىزمەتكەرلەر، ارناۋلى مەملەكەتتىك ورگانداردىڭ قىزمەتكەرلەرى، بيۋدجەتتىك ۇيىمداردىڭ باسشىلارى ءباس تىگە المايدى. بۇل شامامەن 280 مىڭ ادام. ولارعا ەشقانداي ەسكەرتۋ بولمايدى. ياعني ءباس تىككەن جاعدايدا بىردەن جۇمىستان شىعارىلادى.
مۇنىمەن قوسا، بايلانىس وپەراتورلارىنا قۇمار ويىنداردىڭ جارناماسى بار حابارلامالاردى جىبەرۋىنە تىيىم سالىندى. سونداي-اق بۋكمەكەرلىك كەڭسەلەر مەن كازينولاردى جارنامالاۋ بارىنشا شەكتەلگەن.
ليسەنزياسى جوق شەتەلدىك بۋكمەكەرلىك كەڭسەلەردىڭ، توتاليزاتورلاردىڭ ينتەرنەت رەسۋرستارىنا، ونلاين-كازينولارعا تىيىم سالىندى. ەندى ونلاين-كازينولاردى ۇيىمداستىرۋشىلاردى 2 جىلعا دەيىن باس بوستاندىعىنان ايىرۋ جازاسى ەسكەرىلگەن، ياعني قىلمىستىق جاۋاپكەرشىلىككە تارتىلادى.