الماتىدا №16 قالالىق ەمحانانىڭ بازاسىندا «العاشقى مەديسينالىق-سانيتارلىق كومەك دەڭگەيىندە ونكولوگيالىق ساقتىق جانە سكرينينگتىك باعدارلامالاردى جۇرگىزۋ ماسەلەلەرى» تاقىرىبىندا وتاندىق شەبەرلىك ساعاتى وتكىزىلۋدە، وعان جالپى پراكتيكا دارىگەرلەرى، امبۋلاتوريالىق جاعدايدا مەديسينالىق كومەك كورسەتەتىن دەنساۋلىق ساقتاۋ باسقارماسىنىڭ مەديسينالىق ۇيىمدارىنىڭ دارىگەر-تەراپيەۆتەرى قاتىسۋدا، دەپ حابارلايدى اlmaty-akshamy.kz.
شەبەرلىك ساعاتىن س.د. اسفەندياروۆ اتىنداعى قازاق ۇلتتىق مەديسينا ۋنيۆەرسيتەتىنىڭ ونكولوگيا كافەدراسىنىڭ دوسەنتى جانە پروفەسسورى ارمان حوجايەۆ پەن ايجان دجاقىپبايەۆا جۇرگىزەدى.
قازىرگى ۋاقىتتا قاتەرلى ىسىكتەردى ەرتە دياگنوستيكالاۋ ماسەلەلەرى جانە ونكولوگيالىق پاسيەنتتەردى ديسپانسەرلەۋ اسپەكتىلەرى ونكولوگيالىق تاجىريبەدە باسىمدىقتاردىڭ ءبىرى بولىپ تابىلادى.
ءبىزدىڭ ەلىمىزدە دە، شەتەلدە دە قاتەرلى ىسىكتەردى ەرتە دياگنوستيكالاۋ ادىستەرىنىڭ جەتىلدىرىلۋىنە قاراماستان، دياگنوستيكا كەزىندە پاسيەنتتەردىڭ شامامەن 30-40%-ىندا اۋرۋدىڭ III جانە IV ساتىسى بار. وسىعان بايلانىستى قاتەرلى ىسىكتەردى ەرتە ساتىسىندا انىقتاۋدىڭ نەگىزگى ءۇمىتى حالىقتىڭ ەڭ كوپ سانىن قامتۋعا جانە پوپۋلياسيا دەڭگەيىندە جاپپاي تەكسەرۋدى ورىنداۋعا مۇمكىندىك بەرەتىن سكرينينگتىك تەكسەرۋ ادىستەرىنە جۇكتەلەدى.
ونكولوگياداعى ۇلتتىق سكرينينگتىك باعدارلامالارى مۇنى تولىق جۇزەگە اسىرۋعا مۇمكىندىك بەرەدى.
«شەتەلدىك زەرتتەۋلەردىڭ دەرەكتەرىنە سايكەس، ونكولوگيالىق سكرينينگ جۇرگىزۋ قاتەرلى ىسىكتەردى ەرتە كەزەڭدە دياگنوستيكالاۋ جيىلىگىن 10-15%-عا ارتتىرۋعا جانە وسى پاتولوگيادان بولاتىن ءولىم-جىتىمدى 5-7%-عا تومەندەتۋگە مۇمكىندىك بەرەدى. ونكولوگيالىق پاسيەنتتەردى ديسپانسەرلەۋ ماسەلەلەرىن ءبىلۋ بۇگىنگى تاڭدا كەز كەلگەن ماماندىق بويىنشا بىلىكتى دارىگەرلەر ءۇشىن قاجەت»، - دەپ اتاپ ءوتتى وقۋ-ادىستەمەلىك ورتالىقتىڭ باسشىسى گۇلنارا ەردەسوۆا.
شەبەرلىك ساعاتىن ۇيىمداستىرۋشىلار - الماتى قالاسى قوعامدىق دەنساۋلىق ساقتاۋ باسقارماسى جانە جوعارى مەديسينالىق كوللەدجىنىڭ وقۋ-ادىستەمەلىك ورتالىعى. شەبەرلىك ساعاتى جەرگىلىكتى بيۋدجەت ەسەبىنەن قارجىلاندىرىلادى.